മലയാളി യുകെയില്‍ കുഴഞ്ഞുവീണു മരിച്ചു. കെന്റിലെ ഡാര്‍ട്ട്‌ഫോര്‍ഡില്‍ കുടുംബമായി താമസിച്ചു വരികയായിരുന്ന പെരുമ്പാവൂര്‍ കൂഴൂര്‍ ഐരാപുരം കുഴിച്ചാല്‍ വീട്ടില്‍ ജോസഫ് - മേരി ദമ്പതികളുടെ മകന്‍ ബാബു ജേക്കബ് (48) ആണ് മരിച്ചത്.

കഴിഞ്ഞ ദിവസം രാവിലെ എട്ടോടെ നൈറ്റ് ഷിഫ്റ്റ് കഴിഞ്ഞു മടങ്ങിയെത്തിയ ഭാര്യ ജിന്‍സി ജോസഫ് ആണ് ബാബു ജേക്കബിനെ വീടിനുള്ളില്‍ വീണുകിടക്കുന്ന നിലയില്‍ കണ്ടത്. തുടര്‍ന്ന് പാരാമെഡിക്സിന്റെ സഹായം തേടിയെങ്കിലും അപ്പോഴേക്കും മരിച്ചിരുന്നു. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.

സിഡ്കപ്പ് ക്വീന്‍ മേരീസ് ഹോസ്പിറ്റലിലെ കരാര്‍ ജീവനക്കാരന്‍ ആയിരുന്നു. ചൊവ്വാഴ്ച രാത്രി 11.30 വരെയുള്ള ഷിഫ്റ്റില്‍ ബാബു ജേക്കബ് ജോലി ചെയ്തിരുന്നു. തുടര്‍ന്ന് വീട്ടില്‍ എത്തിയശേഷം രാത്രി 12ഓടെ ജിന്‍സിയെ ഫോണില്‍ വിളിച്ചിരുന്നു. അസുഖങ്ങള്‍ ഒന്നും ബാബു ജേക്കബിനെ അലട്ടിയിരുന്നില്ല. ജിന്‍സി ജോസഫിന് കെന്റിലെ ഒരു സ്വകാര്യ കെയര്‍ ഹോമില്‍ ജോലി കിട്ടിയതിനെ തുടര്‍ന്ന് ഒരു വര്‍ഷം മുന്‍പാണ് ബാബു ജേക്കബ് യുകെയില്‍ എത്തുന്നത്.

മൃതദേഹം നാട്ടിലെത്തിച്ചു സംസ്‌കരിക്കും. ഇതിനായി യുക്മ ചാരിറ്റി ഫൗണ്ടേഷന്റെ സഹകരണത്തോടെ ഡാര്‍ട്ട്ഫോര്‍ഡ് മലയാളി അസോസിയേഷന്‍, യുക്മ സൗത്ത് ഈസ്റ്റ് റീജന്‍ എന്നിവയുടെ നേതൃത്വത്തില്‍ ഫണ്ട് ശേഖരണം ഉള്‍പ്പടെയുള്ള പ്രവര്‍ത്തനങ്ങള്‍ നടന്നു വരികയാണ്.