കേംബ്രിഡ്ജ്: കലാലോകം ആകാംക്ഷയോടെ കാത്തിരിക്കുന്ന യു കെ യിലെ ഏറ്റവും വലിയ നൃത്ത-സംഗീത-ദൃശ്യ കലോത്സവം മറ്റന്നാള്‍ ഫെബ്രുവരി 22 ന് ശനിയാഴ്ച കേംബ്രിഡ്ജിലെ ദി നെതര്‍ഹാള്‍ സ്‌കൂള്‍ ഓഡിറ്റോറിയത്തില്‍ അരങ്ങേറും. ഏട്ടാമത് സെവന്‍ ബീറ്റ്സ് സംഗീതോത്സവത്തില്‍ പ്രശസ്ത ചലച്ചിത്ര താരം എസ്ഥേര്‍ അനില്‍ മുഖ്യാതിഥിയായി പങ്കുചേരും. മലയാളം, തമിഴ്,തെലുങ്ക് അടക്കം നിരവധി സിനിമകളില്‍ ശ്രദ്ധേയമായ റോളുകള്‍ ചെയ്യുവാനും,  അഭിനയ മികവില്‍ സിനിമാ മേഖലയില്‍ ശ്രദ്ധേയമായ ഇടം കണ്ടെത്തുവാനും കഴിഞ്ഞ എസ്ഥേര്‍ നിരവധി പുരസ്‌കാരങ്ങളും കരസ്ഥമാക്കിയിട്ടുണ്ട്.

ചരിത്ര നഗരിയും, സാംസ്‌ക്കാരിക, വിദ്യാഭ്യാസ സിരാ കേന്ദ്രവുമായ കേംബ്രിഡ്ജിന്റെ പ്രഥമപൗരനും മലയാളികളുടെ അഭിമാനവുമായ മേയര്‍ കൗണ്‍. ബൈജു തിട്ടാല സെവന്‍ ബീറ്റ്സ് സംഗീതോത്സവം ഉദ്ഘാടനം ചെയ്യും. ഈസ്റ്റ് ആംഗ്ലിയായിലെ പ്രമുഖ മലയാളി കൂട്ടായ്മ്മയും, കലാ-കായിക-സാമൂഹ്യ രംഗത്തെ ശ്രദ്ധേയരുമായ കേംബ്രിഡ്ജ് മലയാളി അസ്സോസ്സിയേഷനാണ്  സംഗീതോത്സവത്തിന് ആതിഥേയത്വം വഹിക്കുക.

യു കെ യിലെ കലാ-സാംസ്‌കാരിക-സാമൂഹ്യ രംഗത്തു നിന്നുള്ള പ്രമുഖ വ്യക്തിത്വങ്ങള്‍ പങ്കു ചേരുകയും യു കെ യിലെ കലാസ്വാദകര്‍ ആകാംക്ഷയോടെ കാത്തിരിക്കുകയും ചെയ്യുന്ന സംഗീതോത്സവത്തിന്  മറ്റന്നാള്‍ ഫെബ്രുവരി 22 നു ശനിയാഴ്ച്ച ഉച്ചക്ക് രണ്ടരക്ക് തിരിതെളിയും.

രാത്രി പത്തര വരെ നീണ്ടു നില്‍ക്കുന്ന കലോത്സവ വേദിയില്‍ മലയാള ഭാഷക്ക് നിരവധി നിത്യഹരിത ഗാനങ്ങള്‍ സമ്മാനിച്ച പ്രശസ്ത കവി പത്മശ്രീ ഓ എന്‍ വി സാറിനും, മലയാളികളുടെ പ്രിയ ഭാവ ഗായകനും വിവിധ ഭാഷകളിലായി പതിനാറായിരത്തില്‍ പരം ഗാനങ്ങള്‍ ആലപിക്കുകയും ചെയ്ത പി ജയചന്ദ്രന്‍ സാറിനും ട്രിബൂട്ടുകളും അനുസ്മരണവും തഥവസരത്തില്‍ അര്‍പ്പിക്കും. ഇരുവരുടെയും ഗാനങ്ങള്‍ കോര്‍ത്തിണക്കി അര്‍ഹമായ ദൃശ്യ-ശ്രവണ ശ്രദ്ധാഞ്ജലിയാവും മഹാരഥന്മാര്‍ക്കായി ആരാധകവൃന്ദത്തോടൊപ്പം  സമര്‍പ്പിക്കുക.

തികച്ചും സൗജന്യ പ്രവേശനം അനുവദിക്കുന്ന സംഗീതോത്സവത്തില്‍  യു കെ യില്‍ ഇദംപ്രഥമമായി അവതരിപ്പിക്കുന്ന പൗരാണിക കേരള നാടന്‍ കലാരൂപമായ പൂതപ്പാട്ടുമായി ടീം ഡെര്‍ബിയും, കുട്ടികളുടെ  ലൈവ് ഓര്‍ക്കസ്ട്രയുമായി അരങ്ങേറ്റം കുറിക്കുവാന്‍ ബെഡ്‌ഫോര്‍ഡ് ബ്‌ളാസ്റ്റേഴ്സും, കേംബ്രിഡ്ജിലെ പ്രശസ്ത ലൈവ് ബാന്‍ഡായ മല്ലു ബാന്‍ഡും, ബോളിവുഡ് നൃത്തവിസ്മയവുമായി 'റിഥം  ക്യുന്‍സും' ഗണേശ വന്ദനവുമായി 'മാതംഗി ഗ്രൂപ്പും'  വേദിയെ പുളകം കൊള്ളിക്കും.  പ്രഗത്ഭരായ കലാകാരുടെ സര്‍ഗ്ഗ പ്രതിഭ തെളിയിക്കുന്ന 60 ല്‍ പരം സംഗീത-നൃത്ത ഇനങ്ങള്‍ കൂടി ചേരുമ്പോള്‍ വര്‍ണ്ണാഭമായ കലാ വസന്തം ആവും ശനിയാഴ്ച കേംബ്രിഡ്ജില്‍ പൂവിടുക.

യു കെ  മലയാളികള്‍ക്കിടയില്‍ നിന്നും ബിസിനസ്സ് രംഗത്തെ ശ്രദ്ധേയമായ വിജയം കൈവരിച്ച വ്യക്തിത്വങ്ങളെ തഥവസരത്തില്‍ ആദരിക്കും.

സദസ്സിന് മധുരഗാനങ്ങള്‍ ആവോളം ശ്രവിക്കുവാനും, നൃത്യ-നൃത്ത്യങ്ങളുടെ വശ്യസുന്ദരവും, ചടുലവുമായ മാസ്മരിക  കലാപ്രകടനങ്ങള്‍ ആസ്വദിക്കുവാനുള്ള  സുവര്‍ണ്ണാവസരമാവും സംഗീതോത്സവ വേദി സമ്മാനിക്കുക.

ചാരിറ്റി പ്രവര്‍ത്തനങ്ങളിലൂടെ കേരളത്തില്‍ നിരവധി കുടുംബങ്ങള്‍ക്ക് താങ്ങും തണലുമായി മാറിയ സെവന്‍ ബീറ്റ്സ്, ജീവ കാരുണ്യ പ്രവര്‍ത്തനത്തിനായാണ് സംഗീതോത്സവ വരുമാനം ഉപയോഗിക്കുക. ആകര്‍ഷകമായ സമ്മാനം നല്‍കുന്ന 'ചാരിറ്റി റാഫിള്‍' നറുക്കെടുപ്പും ജീവകാരുണ്യ ധനശേഖരണത്തിന്റെ ഭാഗമായി ഉള്‍പ്പെടുത്തിയിട്ടുണ്ട്.  

കേരളത്തനിമയില്‍ ചൂടുള്ള രുചിക്കൂട്ടുകളുമായി ഫുഡ് സ്റ്റോളുകള്‍ ഉച്ചക്ക് രണ്ടു മണിമുതല്‍ ഹാളിനോടനുബന്ധിച്ചു തുറന്നു പ്രവര്‍ത്തിക്കുന്നതാണ്. കേംബ്രിഡ്ജിലെ നെതര്‍ഹാള്‍ സ്‌കൂള്‍ കോമ്പൗണ്ടില്‍ വിശാലവും, സൗജന്യവുമായ കാര്‍പാര്‍ക്കിങ് സൗകര്യങ്ങളും ഉണ്ടായിരിക്കുന്നതാണ്.

സംഗീത വിരുന്നും, സംഘാടക മികവും, ഒപ്പം ജീവ കാരുണ്യ പ്രവര്‍ത്തനവും കൊണ്ട്, യൂകെ മലയാളികള്‍ ഹൃദയത്തിലേറ്റിയ സെവന്‍ ബീറ്റ്സ് സംഗീതോത്സവം, മതിമറന്ന് ആനന്ദിക്കുവാനും ആസ്വദിക്കുവാനും സുവര്‍ണ്ണാവസരം നല്‍കുന്ന അതിന്റെ സീസണ്‍ 8  ന്റെ ഭാഗമാകുവാന്‍ ഏവരെയും ഹൃദയപൂര്‍വ്വം ക്ഷണിച്ചുകൊള്ളുന്നു.

കൂടുതല്‍ വിവരങ്ങള്‍ക്ക് ബന്ധപ്പെടുക:
Abraham Lukose: 07886262747
Sunnymon Mathai:07727993229
Jomon Mammoottil:
07930431445
Manoj Thomas:
07846475589
Appachan Kannanchira: 
07737 956977

Venue: The Netherhall School , Queen Edith's Way, Cambridge, CB1 8NN