മലയാള ഭാഷതന്‍ മാധുര്യമോതിയ
മഹനീയ കവികള്‍ തന്‍ തൂലികത്തുമ്പിലെ

മനസിന്റെയാഴത്തിലുള്ളൊരു കല്പന
കവിതയായ് കാട്ടിയ സുന്ദര മലയാളം

അക്ഷര ശകലങ്ങളെണ്ണമറ്റാത്തൊരു
അക്ഷയപാത്രമായ് മാറിയ മലയാളം

ഹരിതാഭയുള്ളൊരാ കേരള മണ്ണിന്റെ
ഹരിതയാം ഭംഗിയിലലിയുന്നു മലയാളം

ആദിമ ദ്രാവിഡ ഭാഷതന്‍ സൗന്ദര്യ -
മാകെ ജ്വലിപ്പിച്ച മധുരമാം മലയാളം

തുഞ്ചത്തെഴുത്തച്ഛന്‍ ആത്മാവു നല്‍കിയ
മാമലനാടിന്റെ ഭാഷയാം മലയാളം

ഭാരതഭാഷതന്‍ ശ്രേഷ്ഠമാം ശ്രേണിയില്‍
വേറിട്ടു നിന്നൊരാ സുന്ദര മലയാളം

ഭാരത സംസ്‌കാരമുള്‍ക്കൊണ്ടൊരാ ഭൂവിന്‍
ഭാഷതന്‍ പ്രൗഢിയിലലിയുന്നു മലയാളം

മലനാട്ടിന്‍ മക്കളെ മറക്കാതിരിക്കണെ
മനതാരിലുണരുമീ മാതാവിന്‍ ഭാഷയെ...