ഫോമായുടെ ആദ്യ ഉന്നതതല  വനിതാ സംഗമത്തിലേക്ക് നോർത്തമേരിക്കയിലെ എല്ലാ മലയാളി വനിതകളേയും ക്ഷണിക്കുന്നു.  ഫെഡറേഷൻ ഓഫ് മലയാളി അസോസിയേഷൻസ് ഓഫ് അമേരിക്കാസ് (ഫോമാ), 'സഖി - ഫ്രണ്ട്സ് ഫോറെവർ' എന്ന പേരിൽ ആദ്യമായി വനിതാ സംഗമം(വിമൻ സമ്മിറ്റ്) സംഘടിപ്പിക്കുന്നതിലൂടെ  ഒരു പുതിയ ചരിത്രം കുറിക്കുകയാണ്. 2025 സെപ്റ്റംബർ 26 മുതൽ 28 വരെ പെൻസിൽവാനിയയിലെ വിൽക്സ്-ബാരെയിലുള്ള വുഡ്‌ലാൻഡ്‌സ് ഇൻ ആൻഡ് റിസോർട്ടിൽ വച്ചാണ് വനിതാസംഗമം നടക്കുക.'ശാക്തീകരിക്കുക. ഉയർത്തുക, നയിക്കുക' എന്നതാണ്  പ്രമേയം. സ്ത്രീകളുടെ നേട്ടങ്ങളും സൗഹൃദങ്ങളും  ആഘോഷിക്കാനും വെല്ലുവിളികളെ മറികടക്കുന്നതിനും സമൂഹത്തിലെ ഉന്നതസ്ഥാനങ്ങളിലിരിക്കുന്നവർ, സംരംഭകർ, പ്രൊഫഷണലുകൾ, വിദ്യാർത്ഥികൾ, വീട്ടമ്മമാർ എന്നിങ്ങനെ വിവിധ തലങ്ങളിലെ വനിതകളെ ഒരുമിച്ച്  കൊണ്ടുവരിക എന്ന ലക്ഷ്യത്തോടെയാണ് പരിപാടി സംഘടിപ്പിച്ചിരിക്കുന്നത്. 

ഫോമായുടെ ദേശീയ വനിതാ ഫോറം നേതൃത്വം നൽകുന്ന ഈ മഹാസംഗമം, പ്രവാസികളും അല്ലാത്തവരുമായ മലയാളി  സ്ത്രീകളുടെ ശബ്ദം മലയാളിസമൂഹത്തിൻ്റെ ഉന്നമനത്തിനായി ഉയർന്നുകേൾക്കേണ്ടതിൻ്റെ ആവശ്യകത ബോധ്യപ്പെടുത്തുക എന്ന ഉദ്ദേശത്തോടെയാണ് നടപ്പാക്കുന്നത്. സംഘടനയുടെ ഒരു സുപ്രധാന നാഴികക്കല്ലായിരിക്കുമിതെന്ന് ഭാരവാഹികൾ അറിയിച്ചു. സാമൂഹിക ഉത്തരവാദിത്തത്തോടെയുള്ള ഫോമായുടെ നിരന്തരമായ പ്രതിബദ്ധതയുടെ ഭാഗമായി, ഈ മഹാസംഗമത്തിലെ, വരുമാനത്തിന്റെ ഒരു ഭാഗം ഇന്ത്യയിലെ സ്ത്രീകളുടെ വിദ്യാഭ്യാസം, ആരോഗ്യം, സമൂഹക്ഷേമം എന്നിവക്കും ജീവകാരുണ്യ പ്രവർത്തനങ്ങൾക്കുമായി വിനിയോഗിക്കുമെന്നും അവർ കൂട്ടിച്ചേർത്തു. ഇന്ന് സമൂഹത്തിലെ ഏത് രംഗത്തെും സ്ത്രീയുടെ ശബ്ദം പ്രധാനമാണ് എന്നതുകൊണ്ട് ഏവരുടെയും സാന്നിധ്യം പ്രതീക്ഷിക്കുന്നതായി സംഘാടകർ അഭിപ്രായപ്പെട്ടു. സമൂഹിക നേതൃത്വം, സ്ത്രീ ശാക്തീകരണം, സാമൂഹീക നന്മ തുടങ്ങി ഒരു പുതിയ അധ്യായത്തിന്റെ ഭാഗമാകാനും സഹജീവികളുടെ  ജീവിതത്തിൽ അർത്ഥവത്തായ മാറ്റങ്ങൾ വരുത്തുന്നതിനും ഒപ്പം നിൽക്കണമെന്നും ഇവർ അഭ്യർത്ഥിച്ചു.

പരിപാടിയുടെ സവിശേഷതകൾ: 1.ബിസിനസ് രംഗത്തെ പ്രമുഖരിൽ നിന്നുള്ള മുഖ്യപ്രഭാഷണങ്ങൾ.2.നേതൃത്വം, സംരംഭകത്വം, ആരോഗ്യം & ക്ഷേമം, സാംസ്കാരിക സ്വത്വം എന്നിവയെക്കുറിച്ചുള്ള സംവേദനാത്മക പാനൽ ചർച്ചകൾ

3.സ്ത്രീകളുടെ ഉന്നമനത്തിനും നേതൃപാടവത്തിനും  നെറ്റ് വവർക്കിങ്ങിനും   സഹായിക്കുന്ന വർക്ക്‌ഷോപ്പുകൾ. 

രജിസ്ട്രേഷൻ ഇതിനോടകം ആരംഭിച്ചുകഴിഞ്ഞു.www.fomaa.org/womenssummit2025 എന്ന വെബ്‌സൈറ്റിലൂടെ സീറ്റ് ബുക്ക് ചെയ്യാം.2025 ഓഗസ്റ്റ് 1 വരെ ബുക്ക് ചെയ്യുന്നവർക്ക്  പ്രീ ബുക്കിംഗ് ഡിസ്കൗണ്ട് ലഭ്യമാണ്.

ഈ മഹാസംഗമം വെറുമൊരു ഒത്തുചേരലല്ല, സ്ത്രീ ശാക്തീകരണത്തിനുള്ള ഒരു സമ്മേളനമാണ് എന്ന്  ഫോമാ  പ്രസിഡന്റ്  ബേബി മണക്കുന്നേൽ അഭിപ്രായപ്പെട്ടു.  ഇത്തരത്തിലുള്ള ഒരു വനിതാസംഗമം സംഘടിപ്പിക്കുന്നതിൽ  അഭിമാനിക്കുന്നതായി ഫോമാ സെക്രട്ടറി ബൈജു വർഗീസ്, ട്രഷറർ സിജിൽ പാലക്കലോടി, വൈസ് പ്രസിഡന്റ് ഷാലു പുന്നൂസ്, ജോയിന്റ് സെക്രട്ടറി പോൾ പി. ജോസ്,ജോയിന്റ് ട്രഷറർ അനുപമ കൃഷ്ണൻ എന്നിവർ അറിയിച്ചു. ഇത് സ്ത്രീകളുടെ പ്രചോദനത്തിനും സഹകരണത്തിനും വളർച്ചയ്ക്കുമുള്ള  വേദിയാണ്, എല്ലാ പശ്ചാത്തലങ്ങളിലുമുള്ള വനിതകൾ ഇതിൽ ഭാഗമാകണമെന്നും  ഫണ്ട് സ്വരൂപിക്കുന്നതിനും  പരിപാടി വിജയിപ്പിക്കുന്നതിനും എല്ലാവരും ഒപ്പം വേണമെന്നും ഇവർ അഭ്യർത്ഥിച്ചു. ഒപ്പം  സ്പോൺസർമാരോടുള്ള അഗാധമായ നന്ദിയും അറിയിച്ചു.