'മഴയോര്‍മ്മ പുസ്തകം' - (വലന്റയിന്‍ ദിനം: കവിത: ബിന്ദു ടിജി)
ബിന്ദു ടിജി Published on 12 February, 2016
എഴുതുക നീയെന്നോര്‍മ്മ
പുസ്തകത്തിലിരുവരി
ഒട്ടും വൈകാതെയിന്ന്
നമ്മുടെ കരളിലെ കനവും
മിഴിയിലെയൊരേ മോഹവും
ചെറു കിളിയുടെ കനിവുള്ള പാട്ടും
മൗനമായെന്നോട് മൂളുന്നോരീരടി
ഇരു കയ്യാലെ കനല്‍ കോരി ഭുജിച്ചും
തീമുള്ളിന്റെ മീതെയും
കൊടും കാട്ടിലും കരിമേഘത്തിന്‍ കീഴിലും
ദൂരമേറെ നടന്നു കാല്‍ കുഴഞ്ഞു
ഞാനിത്തിരി തണല്‍ തേടി
വഴിവക്കിലെ മാമരച്ചോട്ടിലിരിക്കേ
മഴ മറന്നു വെച്ച മോഹമുത്തുകള്‍
പതിയെയിലകളിളകിയെന്‍ നെറുകയില്‍ ചാര്‍ത്തും
അന്നു നിന്‍ മുഖാംബുജ സ്മിതമെന്റെ
ചിന്തയിയിലാനന്ദ ദീപം കൊളുത്തും
പാഴ്ക്കരിങ്കല്ലായി മാറാന്‍ തുടങ്ങുമെന്‍
ഹൃത്തില്‍ പിന്നെയും പൂത്തു
വിരിയുമപൂര്‍വ്വ സുന്ദരത്താരക പൂക്കള്‍
തൂ മധു കിനിഞ്ഞൂറും കളിപ്പൊയ്ക
യായ് മാറുമെന്‍ മാനസം വീണ്ടും
ഈ ലഘു ജീവിത വീഥിയെ തെളിനീര്‍
നനച്ചു കുളിര്‍പ്പിച്ചു നിത്യവും
തളിര്‍പ്പട്ടുടുപിച്ചു മോഹിനിയാക്കി
യൊരുക്കി കയ്യില്‍ മംഗള ദീപവുമേകി
യിരുളകറ്റും നിറ സൗഹൃദത്തിങ്കളേ
നാം തമ്മില്‍ പിരിയുവാനില്ല നിമിഷങ്ങളേറെ
യതാകയാല്‍ നീയോര്‍ത്തു കുറിയ്ക്കുകയിരുവരി
യെന്നോര്‍മ്മ പുസ്തകത്താളില്‍
നമ്മുടെ കരളിലെ കനവും
മിഴിയിലെ സമ മോഹവും
ചെറു കിളിയുടെ കനിവുള്ള പാട്ടും
മൗനമായെന്നോട് മൂളുന്നോരീരടി
Facebook Comments
Comments
Anthappan 2016-02-12 08:08:03
കാവ്യകലയുടെ അതിസൂക്ഷ്മ തലങ്ങളിലേക്ക് വായനക്കാരെ കൂട്ടികൊണ്ടുപോകുന്ന ഒരു കവയിത്രിയാണ് ശ്രീമതി ബിന്ദു. ജീവിതയാത്രയിൽ ,
" കനൽക്കോരി ഭുജിച്ചും
തീമുള്ളിന്റെ മീതെയും
കൊടും കാട്ടിലും കരിമേഘത്തിൻ കീഴിലും
ദൂരെമേറെ നടന്നു കാൽക്കുഴഞ്ഞു "
മരത്തണലിൽ ഇരിക്കുമ്പോൾ ശിരസ്സിൽ വീണു മുഖത്തിലൂടെ ഊർന്നു താഴേക്ക് പോകുന്ന ' മഴ മറന്നുവച്ച മോഹമുത്തുകൾക്ക്' ജീവിതപ്രയാണത്തിലെ തിക്താനുഭവങ്ങൾക്ക് സ്മൃതിഭ്രംശം ഉണ്ടാക്കി ആനന്ദം പകരാൻ കഴിയുമെങ്കിൽ, ശ്രീകുമാരാൻതമ്പിയുടെ മനോഹര കവിതയിലെപ്പോലെ , " ആ നിമിഷത്തിന്റെ നിർവൃതിയിൽ ഞാൻ ഒരാവണി തെന്നലായി മാറിയേനെ "
നല്ലൊരു കവിതയ്ക്ക് അഭിനന്ദനം !
വായനക്കാരൻ 2016-02-12 21:34:48
അപാരേ കാവ്യസംസാരേ
കവിരേവ പ്രജാപതിഃ
യഥാസ്മൈ രോചതേ വിശ്വം
തഥേദം പരിവര്‍ത്തതേ
അനന്തമായ ഈ കാവ്യസംസാരത്തില്‍ ഒരേയൊരു സ്രഷ്ടാവേയുള്ളു- കവി. അദ്ദേഹം ആഗ്രഹിക്കുംപോലെ ഈ ലോകം ചുറ്റിത്തിരിയുന്നു.
ഒരു പരകായപ്രവേശത്തിലൂടെന്നപോലെ ബിന്ദു വായനക്കാരനെ കവിതയുടെ അകത്താരിലൂടെ കൈപിടിച്ച് നടത്തിക്കുന്നതിൽ വിജയിക്കുന്നു. വായിൽ തോന്നുന്നത് കവിതയെന്ന പേരിൽ എഴുതി അവാർഡു വാങ്ങുന്നവർ ശ്രദ്ധിക്കുക.
ആരാണാവോ anthappan-ലൂടെ പരകായപ്രവേശം നടത്തി കമന്റെഴുതിയത്!
Anthappan 2016-02-13 08:33:15
Some of the theologians are unleashing there power against me. But what they intended for bad turned out to be for good. I like the commend and the poetess deserves it. But at the same time a holistic warfare is in the horizon
Leave A Reply
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക
അസഭ്യവും നിയമവിരുദ്ധവും അപകീര്ത്തികരവുമായ പരാമര്ശങ്ങള് പാടില്ല. വ്യക്തിപരമായ അധിക്ഷേപങ്ങളും
ഉണ്ടാവരുത്. അവ സൈബര് നിയമപ്രകാരം കുറ്റകരമാണ്. അഭിപ്രായങ്ങള് എഴുതുന്നയാളുടേത് മാത്രമാണ്. ഇ-മലയാളിയുടേതല്ല
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala