ഡിജിറ്റല്‍ സാങ്കേതികവിദ്യയുടെ കാലത്ത് ഉണ്ടായ ഏറ്റവും വലിയ വിപ്ലവമാണ് യുട്യൂബ് എന്ന് എനിക്ക് പലപ്പോഴും തോന്നിയിട്ടുണ്ട്. ആര്‍ക്ക് എപ്പോള്‍ വേണമെങ്കിലും എവിടെ വച്ചു വേണമെങ്കിലും കാലവും നേരവുമൊന്നും നോക്കാതെ യുട്യൂബില്‍ വീഡിയോകള്‍ അപ് ലോഡ് ചെയ്യാമായിരുന്നു. കുട്ടികളുടെ വീഡിയോ ഇവിടെ ശേഖരിച്ചു വയ്ക്കാമെന്നും അവര്‍ വലുതാവുമ്പോള്‍ കാട്ടിക്കൊടുക്കാമല്ലോ എന്നൊക്കെയും പലരും പറഞ്ഞു കേള്‍ക്കുകയും ചെയ്തു. ആലോചിച്ചു നോക്കിയപ്പോള്‍ വലിയൊരു അത്ഭുതം തന്നെ. ലോകത്തുള്ള എത്രയോ ലക്ഷം പേരാണ് ഈ യുട്യൂബ് ഉപയോഗിക്കുന്നത്. അവര്‍ ഈ ഫയലുകളെല്ലാം എങ്ങനെ സേവ് ചെയ്തു വയ്ക്കുന്നു. അതിന് എത്രമാത്രം വലിയ സേര്‍വര്‍ വേണ്ടി വരും. ഇനിയുമിത് കൂടിക്കൊണ്ടേയിരിക്കുകയാണ്. ഇങ്ങനെ പോയാല്‍ ഇതിനൊരു അവസാനമില്ലേ... എന്നൊക്കെയായിരുന്നു എന്റെ തോന്നലുകള്‍. ഇതാ, ഇപ്പോള്‍ അതിനുള്ള ഉത്തരം യുട്യൂബ് തന്നെ സമ്മാനിച്ചിരിക്കുന്നു. യുട്യൂബില്‍ കിടക്കുന്ന വീഡിയോകള്‍ നീക്കം ചെയ്യാനുള്ള പ്രക്രിയയ്ക്ക് ഡിസംബര്‍ മുതല്‍ക്ക് ആരംഭം കുറിക്കുന്നു. യുട്യൂബില്‍ നിന്നും ലക്ഷങ്ങള്‍ ഉണ്ടാക്കുന്ന വ്‌ളോഗര്‍മാരെ ലക്ഷ്യമിട്ട് നൂറു കണക്കിനു ഗാഡ്‌ജെറ്റുകള്‍ ഇപ്പോള്‍ തന്നെ വിപണയില്‍ നില്‍ക്കുമ്പോഴാണ് ഈ ശുദ്ധികലശം ആരംഭിക്കാന്‍ യൂട്യുബ് തുടങ്ങുന്നതെന്നും ഓര്‍ക്കണം. എന്തായാലും, എല്ലാത്തിനും ഒരു അവസാനമുണ്ടല്ലോ- അതിനാണ് ഇവിടെ ആരംഭം കുറിക്കുന്നത്. കുഞ്ഞുങ്ങളുടെ വീഡിയോ അവര്‍ വലുതാവുമ്പോള്‍ കാണിച്ചു കൊടുക്കാന്‍ വേണ്ടി യുട്യൂബില്‍ കാത്തുസൂക്ഷിച്ചിരുന്നവര്‍ക്കൊക്കെയും ഇനി നിരാശപ്പെടേണ്ടി വരും. 

കൃത്യമായി പറഞ്ഞാല്‍, ഡിസംബര്‍ 10നാണ് യുട്യൂബിലെ അപ്‌ഡേറ്റുചെയ്ത സേവന നിബന്ധനകള്‍ പുറത്തിറക്കുന്നത്. കൂടാതെ കമ്പനി ആഗ്രഹിക്കാത്ത ഒരു വീഡിയോയും കമ്പനി നിലനിര്‍ത്തേണ്ടതില്ലെന്ന ഓര്‍മ്മപ്പെടുത്തലായി ഒരു പുതിയ നിബന്ധനയും അന്നു മുതല്‍ക്കു പ്രാബല്യത്തില്‍ വരികയാണ്. അതായത്, 'ഉള്ളടക്കം ഹോസ്റ്റ് ചെയ്യാനോ സേവിക്കാനോ ഇനി മുതല്‍ യുട്യൂബ് ബാധ്യസ്ഥനല്ല,' പുതിയ സേവന നയ നിബന്ധനകള്‍ ഇങ്ങനെ വ്യക്തമാക്കുന്നു. യുട്യൂബ് താരതമ്യേന തുറന്ന ഒരു പ്ലാറ്റ്‌ഫോം ആയതിനാല്‍, വീഡിയോകള്‍ നിലനിര്‍ത്താന്‍ കമ്പനിയുടെ അനുമതി ആവശ്യമാണെന്ന് ഇതിനര്‍ത്ഥമില്ല.

അതേസമയം, പുതിയ സേവനനയങ്ങള്‍ പുറത്തു വന്നതു മുതല്‍ക്കേ വീഡിയോ നീക്കംചെയ്യല്‍ പ്രക്രിയയെക്കുറിച്ച് യുട്യൂബിന് എല്ലാ വശങ്ങളില്‍ നിന്നും കാര്യമായ വിമര്‍ശനങ്ങള്‍ നേരിടേണ്ടി വരുന്നു. കമ്പനിയുടെ നിയമങ്ങള്‍ക്ക് വിരുദ്ധമായ വീഡിയോകള്‍ നീക്കംചെയ്യാന്‍ യുട്യൂബിന് കൂടുതല്‍ ചെയ്യാനാകുമെന്ന് ചില വിമര്‍ശകര്‍ വാദിക്കുന്നു. പക്ഷേ അവ പൂര്‍ണ്ണമായും ലംഘിക്കരുതത്രേ. മറ്റുള്ളവര്‍ വാദിക്കുന്നത്, യുട്യൂബ് പൂര്‍ണ്ണമായും തുറന്ന പ്ലാറ്റ്‌ഫോം ആയിരിക്കണമെന്നും അവശേഷിക്കുന്നവയെക്കുറിച്ചും അല്ലാത്തതിനെ നിയന്ത്രിക്കരുതെന്നുമാണ്. സ്വതന്ത്ര സംഭാഷണത്തിന്റെ ഒരു ചാമ്പ്യനെന്ന നിലയില്‍ എക്‌സിക്യൂട്ടീവുകള്‍ വളരെക്കാലമായി പ്ലാറ്റ്‌ഫോമിനെ പ്രതിരോധിക്കുന്നുണ്ടെങ്കിലും പ്രചരിപ്പിക്കാന്‍ അനുവദിച്ചിരിക്കുന്ന വീഡിയോകളെ നിയന്ത്രിക്കാന്‍ തുടങ്ങിയിരുന്നു. ഇക്കാര്യത്തില്‍ അമേരിക്കയില്‍ നിന്നുള്ള സ്വകാര്യത നയവും വലിയൊരു പ്രശ്‌നമാണ്. കാരണം, അമേരിക്കയില്‍ സ്ഥാപിക്കപ്പെട്ടിരിക്കുന്ന കമ്പനി പൂര്‍ണ്ണമായും അനുസരിക്കുന്നത് യുഎസ് ഫെഡറല്‍ നിയമങ്ങളെയാണ്. അതില്‍ സ്വകാര്യതയും, കുട്ടികളുടെ താത്പര്യങ്ങളുമൊക്കെ വലിയൊരു വിഷയമാണ്. ഗൂഗിളില്‍ തന്നെ ഏറ്റവും കൂടുതല്‍ വരുമാനമുണ്ടാക്കുന്ന കമ്പനിയാണ് യുട്യൂബ് എന്നതും മറക്കരുത്. വരുമാനത്തില്‍ പുതിയ സേവന നയങ്ങള്‍ ഇടിവുണ്ടാക്കുകയല്ല മറിച്ച് വര്‍ദ്ധിപ്പിക്കുകയാണ് ചെയ്യുകയെന്നും ഇതിനു മറുപടിയായി യുട്യൂബ് വക്താക്കള്‍ പറയുന്നു.

ഐടി കമ്പനികള്‍ അവരുടെ സേവന നിബന്ധനകള്‍ എല്ലായ്‌പ്പോഴും അപ്‌ഡേറ്റ് ചെയ്യുന്നുണ്ട്. ഇത് 2019-ലെ യുട്യൂബിന്റെ മൂന്നാമത്തെ മാറ്റമാണ്. ഏറ്റവും പുതിയ ഈ അപ്‌ഡേറ്റുകള്‍ യുട്യൂബിനായുള്ള പുതിയ ഫെഡറല്‍ ട്രേഡ് കമ്മീഷന്‍ മാര്‍ഗ്ഗനിര്‍ദ്ദേശങ്ങള്‍ക്കനുസൃതമായി യുട്യൂബ് വരുത്താനിരിക്കുന്ന മാറ്റങ്ങളുമായി പൊരുത്തപ്പെടുന്നതായി തോന്നുന്നു.

കുട്ടികള്‍ക്കുള്ള പ്ലാറ്റ്‌ഫോമും പരിരക്ഷയും ഉപയോഗിക്കുന്നതെന്നതിനെക്കുറിച്ചുള്ള നിരവധി പ്രശ്‌നങ്ങള്‍ ഫെഡറല്‍ കമ്മീഷന്‍ മുന്നോട്ടു വെക്കുന്നുണ്ട്. കുട്ടികളുടെ ഓണ്‍ലൈന്‍ സ്വകാര്യത പരിരക്ഷണ നിയമം (കോപ്പ) ലംഘിച്ചുവെന്നാരോപിച്ച് സെപ്റ്റംബറില്‍ ഫെഡറല്‍ ട്രേഡ് കമ്മീഷന്‍ ഗൂഗിളിനെതിരെ 170 മില്യണ്‍ ഡോളര്‍ പിഴ ചുമത്തിയത് ഓര്‍ക്കണം. കുട്ടികളുടെ സ്വകാര്യത പരിരക്ഷിക്കുന്നതിനും നിയമത്തിന് അനുസൃതമായി മാറ്റങ്ങള്‍ വരുത്തുന്നതിനും യുട്യൂബ് സമ്മതിച്ചത് ഇതോടെയാണ്. കുട്ടികള്‍ പ്ലാറ്റ്‌ഫോം ഉപയോഗിക്കുമ്പോള്‍ രക്ഷാകര്‍തൃ ഉത്തരവാദിത്തത്തെക്കുറിച്ചുള്ള അപ്‌ഡേറ്റുചെയ്ത ഒരു വിഭാഗവുമായി സേവന നിബന്ധനകള്‍ ഇപ്പോള്‍ വരുന്നു. ഒപ്പം യുട്യൂബ് ഉപയോഗിക്കുന്നതിന് ഓരോ രാജ്യത്തിന്റെയും പ്രായ ആവശ്യകതകള്‍ കൂടുതല്‍ വ്യക്തമായി പറഞ്ഞിട്ടുമുണ്ട്. 'നിങ്ങള്‍ നിങ്ങളുടെ രാജ്യത്ത് പ്രായപൂര്‍ത്തിയാകാത്ത ആളാണെങ്കില്‍, സേവനം ഉപയോഗിക്കുന്നതിന് മുമ്പ് നിങ്ങള്‍ക്ക് എല്ലായ്‌പ്പോഴും നിങ്ങളുടെ രക്ഷകര്‍ത്താവിന്റെയോ രക്ഷിതാവിന്റെയോ അനുമതി ഉണ്ടായിരിക്കണം' എന്ന് സൂചിപ്പിക്കുന്ന ഒരു അറിയിപ്പും ഇതില്‍ ഉള്‍പ്പെടുന്നു. യുട്യൂബ് ഓപ്പണ്‍ ചെയ്യുമ്പോള്‍ തന്നെ ഇതു കാണാം. സ്മാര്‍ട്ട് ടിവിയില്‍ യുട്യൂബ് എടുക്കുമ്പോഴും മറ്റേതൊരു ഗാഡ്ജറ്റ് ഉപയോഗിക്കുമ്പോഴും ഇതു വ്യക്തമായും ഉപയോക്താവ് അറിഞ്ഞിരിക്കണമെന്ന ഉദ്ദേശത്തോടെ തന്നെ കമ്പനി പ്രദര്‍ശിപ്പിക്കുന്നുണ്ട്. മറിച്ച് ഉപയോക്താവിന് പ്രചരിക്കപ്പെടുന്നതു പോലെയൊന്നും നഷ്ടപ്പെടുന്നില്ലെന്ന് അവര്‍ പറയുന്നു. 

'ഞങ്ങളുടെ ഉല്‍പ്പന്നങ്ങള്‍ പ്രവര്‍ത്തിക്കുന്ന രീതിയിലോ, ഞങ്ങള്‍ ഡാറ്റ ശേഖരിക്കുന്ന അല്ലെങ്കില്‍ പ്രോസസ്സ് ചെയ്യുന്ന രീതിയിലോ അല്ലെങ്കില്‍ നിങ്ങളുടെ ഏതെങ്കിലും ക്രമീകരണങ്ങളോ ഞങ്ങള്‍ ഒരിക്കലും മാറ്റുന്നില്ല,' വക്താവ് കൂട്ടിച്ചേര്‍ത്തു. എന്നാല്‍ ഇപ്പോള്‍ കൊണ്ടു വന്നിരിക്കുന്ന മാറ്റങ്ങള്‍ യുട്യൂബിന് കൂടുതല്‍ ശക്തി നല്‍കുന്നതായി തോന്നുന്നു. വരാനിരിക്കുന്ന മാറ്റങ്ങളെക്കുറിച്ച് യുട്യൂബ് തങ്ങളുടെ ഉപയോക്താക്കളെ അറിയിക്കാന്‍ തുടങ്ങിയതുമുതല്‍ വ്യാപകമായി ട്വീറ്റ് ചെയ്ത ഏറ്റവും വിവാദപരമായ ഒരു സംഗതി, നിങ്ങളുടെ വീഡിയോകള്‍ യുട്യൂബ് എടുത്തു കളയുന്നു എന്ന തരത്തിലായിരുന്നു. ഇതാണ് വന്‍ ആശങ്ക സൃഷ്ടിച്ചത്. ഇതില്‍ പകുതിയോളം സത്യമുണ്ടെന്നത് മറച്ചു വെക്കുന്നില്ല. യുട്യൂബ് നിങ്ങളുടെ അക്കൗണ്ട് ആക്‌സസ് അവസാനിപ്പിക്കാനുള്ള അനുവാദമുണ്ട്. തങ്ങളുടെ വിവേചനാധികാരത്തില്‍ ഇക്കാര്യത്തില്‍ തീരുമാനമെടുക്കുമെന്ന് അവര്‍ അറിയിക്കുന്നു. അതായത്, സാമ്പത്തികമായി തങ്ങള്‍ക്ക് ലാഭകരമല്ലാത്ത വീഡിയോകള്‍ പുറത്തു കളയുമെന്നു ചുരുക്കം. അങ്ങനെ വരുമ്പോള്‍ ഒരു കാര്യം പറയാതെ വയ്യ. പണ്ടുണ്ടായിരുന്നതു പോലെ നിങ്ങള്‍ വീഡിയോകളൊക്കെയും വല്ല കാസറ്റിലോ ഡിസ്‌ക്കിലൊക്കെയും എടുത്തു സൂക്ഷിച്ചു വച്ചു കൊള്ളു. കാരണം, ഇപ്പോള്‍ കാണുന്ന ഫേസ്ബുക്കും യുട്യൂബുമൊന്നും നാളെയുണ്ടാകുമോയെന്ന കാര്യത്തില്‍ യാതൊരു ഉറപ്പുമില്ല. അതിന്റെ ചില സൂചനകളാണ് ഇപ്പോള്‍ കണ്ടു കൊണ്ടിരിക്കുന്നത്.