ഞാന്‍ എഴുതുന്ന ഓരോ വരിയിലും 
പറയാത്ത മൊഴിയായ് നീ ഒളിച്ചിരിക്കാന്‍ തുടങ്ങിയിരിക്കുന്നു. 
ഭീതി പടരുന്നത് മറ്റൊരു കാര്യത്തിലാണ് 
നാമെല്ലാം ഒരു നീണ്ട തീവണ്ടി യാത്രയിലാണ് 
സമാന്തര പാളത്തിലൂടെ നിരന്തരം , ദിനം പ്രതി 
ഓരോരോ സ്റ്റേഷനില്‍ വണ്ടി നിര്‍ത്തുമ്പോഴും 
നീയിരിക്കുന്ന സീറ്റിലേക്ക് ഞാന്‍ അറിയാതെ നോക്കി പോകും 
നീയിറങ്ങുന്ന നിമിഷം ഞാനില്ലാതെയാകും
അത്തരം ഒരു കുരുക്കിലാണ് ഞാന്‍ ഇന്ന്  
നിനക്കിറങ്ങേണ്ട സ്റ്റേഷന്‍ - അങ്ങനെയൊന്നു 
ഉണ്ടാകരുത് ഈ ഭൂമിയില്‍  
ഇനി അങ്ങനെയൊന്നുണ്ടായാല്‍, നീ ഇറങ്ങരുതെ 
എന്നോടൊപ്പം വരൂ  യാത്രയവസാനിക്കുവോളം...
എന്നൊക്കെ പറയാന്‍ ഞാന്‍ നിനക്ക് ആരാണ്
നിന്റെ ഹൃദയം ഒരു തേനറയാണ്  
കാട്ടു പൂക്കളുടെ ഹൃദയ രഹസ്യങ്ങള്‍ സംഭരിച്ചു വെച്ച തേനറ 
എത്തിനോക്കുമ്പോള്‍ തന്നെ 
എന്നെ ഉന്മത്തയാക്കുന്ന അപൂര്‍വ്വ പൂപൊയ്ക. 

ബിന്ദു ടിജി