ശരീരഭാരം കുറയ്ക്കാൻ ആഗ്രഹിക്കുന്ന ദശലക്ഷക്കണക്കിന് അമേരിക്കക്കാർക്ക്, ഓസെംപിക് പോലുള്ള സെമാഗ്ലൂറ്റൈഡ് മരുന്നുകൾ ഒരു സ്വപ്നസാക്ഷാത്കാരമാണ്.

എന്നാൽ യുഎസിലെ പോയിസൺ നിയന്ത്രണ കേന്ദ്രങ്ങൾക്ക്, സെമാഗ്ലൂറ്റൈഡിന്റെ ജനപ്രീതി ഒരു പേടിസ്വപ്നമാണിന്ന്. ഈ വർഷം ജനുവരി മുതൽ നവംബർ വരെ, അമേരിക്കയിലെ പോയിസൺ നിയന്ത്രണ കേന്ദ്രങ്ങൾ സെമാഗ്ലൂറ്റൈഡ് ഓവർഡോസ് ഉൾപ്പെടുന്ന ഏകദേശം 3,000 കോളുകൾ റിപ്പോർട്ട് ചെയ്തു, പലപ്പോഴും, അബദ്ധവശാൽ ഇരട്ട ഡോസ് എടുക്കുകയോ തെറ്റായ ഡോസ് എടുക്കുകയോ ചെയ്തതുവഴി സംഭവിച്ചതാകും അത്.

പ്രമേഹമുള്ളവർക്കായി 2017 ൽ ഫുഡ് ആൻഡ് ഡ്രഗ് അഡ്മിനിസ്ട്രേഷനാണ് സെമാഗ്ലൂറ്റൈഡ് ആദ്യമായി അംഗീകരിച്ചത്. ഇത് പ്രമേഹത്തിന് ഉപയോഗിക്കുമ്പോൾ Ozempic എന്നും ശരീരഭാരം കുറയ്ക്കാൻ ഉപയോഗിക്കുമ്പോൾ Wegovy എന്ന പേരിലും വിൽക്കുന്നു.

നിർദ്ദേശിച്ച പ്രകാരം ഉപയോഗിക്കുമ്പോൾ പോലും ഈ മരുന്ന് പാർശ്വഫലങ്ങൾ ഉണ്ടാക്കാം. ഇതിൽ ഓക്കാനം, ഛർദ്ദി, മലബന്ധം എന്നിവ ഉൾപ്പെടാം, പ്രത്യേകിച്ചും ആളുകൾ ആദ്യം മരുന്ന് ഉപയോഗിക്കാൻ തുടങ്ങുമ്പോൾ.
എന്നാൽ സെമാഗ്ലൂറ്റൈഡിന്റെ ജനപ്രീതി വർദ്ധിച്ചതിനാൽ, നിർമ്മാതാക്കൾക്ക് അമിതമായ ഡിമാൻഡിനൊപ്പം നിർമാണം വർദ്ധിപ്പിക്കാൻ കഴിഞ്ഞില്ല, അതിനാൽ 2022 മാർച്ചിൽ ഫാർമസികൾ സംയോജിപ്പിച്ച് മരുന്ന് നിർമ്മിക്കാൻ എഫ്ഡി‌എ അനുവദിച്ചു. കോമ്പൗണ്ടിംഗ് ഫാർമസികൾ, ചേരുവകൾ സംയോജിപ്പിച്ച് വ്യക്തിഗത രോഗിക്ക് അനുയോജ്യമായ മരുന്നുകൾ സൃഷ്ടിക്കുന്നു - ഇത് യഥാർത്ഥ മരുന്നിൽ നിന്ന് വ്യത്യസ്തമായ രൂപത്തിൽ നൽകാം. ഒസെംപിക് നിർമ്മിക്കുന്ന ഫാർമസ്യൂട്ടിക്കൽ കമ്പനിയായ നോവോ നോർഡിസ്ക്,  കുത്തിവയ്‌ക്കാനുള്ള മരുന്ന് ശരിയായ അളവിൽ നൽകാനായി പ്രത്യേകമായി രൂപകൽപ്പന ചെയ്‌ത സുരക്ഷാസംവിധാനങ്ങളോടുകൂടിയ മരുന്നുനിറച്ച പേനകൾ ആണ് വിപണിയിൽ ഇറക്കിയത്.

എന്നാൽ സെമാഗ്ലൂറ്റൈഡ് മരുന്നുകളുടെ സംയുക്തരൂപങ്ങൾ പല ഡോസുകൾ അടങ്ങിയ ഗ്ലാസ് കുപ്പികളിൽ വിപണിയിൽ ലഭ്യമാണ്. ഈ സാഹചര്യത്തിൽ രോഗികൾ സ്വയം നിശ്ചയിക്കുന്ന ഡോസുകൾ സിറിഞ്ചുകളിലേക്ക് വലിച്ചെടുക്കുന്നു. കൂടാതെ ഇതു പലപ്പോഴും ആവശ്യമായതിനേക്കാൾ വളരെ വലിയ ഡോസ് എടുക്കാൻ ഇടയാക്കുകയും ചെയ്യുന്നു.
ഇവിടെയാണ് ഒരുപാട് തെറ്റുകൾ കാണുന്നത് എന്ന് ന്യൂ മെക്സിക്കോ പോയിസൺ ആൻഡ് ഡ്രഗ് ഇൻഫർമേഷൻ സെന്റർ ഡയറക്ടർ ഡോ. ജോസഫ് ലാംസൺ പറഞ്ഞു.
“ഞങ്ങൾ മുമ്പ് കേട്ടിട്ടില്ലാത്ത ഡോസുകൾ ആളുകൾ സ്വയം എടുക്കുന്നതായി ഞങ്ങൾക്ക് റിപ്പോർട്ടുകൾ ലഭിച്ചു,” ലാംസൺ കൂട്ടിച്ചേർത്തു.

50 വയസ്സുള്ള ഒരാൾ അബദ്ധത്തിൽ 5 യൂണിറ്റിന് പകരം 50 യൂണിറ്റ് തന്റെ ആദ്യ ഡോസായി നൽകിയത് അത്തരത്തിലുള്ള ഒരു കേസാണ്. അദ്ദേഹം രണ്ട് ദിവസത്തേക്ക് ഛർദ്ദിക്കുകയും ഒരാഴ്ചത്തേക്ക് ഓക്കാനം അനുഭവിക്കുകയും ചെയ്തു.  എന്നാൽ ഇത്തരത്തിൽ ഓവർഡോസ് സംഭവങ്ങൾ ആവർത്തിച്ചതോടെ നോവോ നോർഡിസ്ക്, രോഗിയുടെ സുരക്ഷയാണ് മുൻ‌ഗണന എന്നും semaglutide.com ൽ വിശദമായി പറഞ്ഞിരിക്കുന്ന സെമാഗ്ലൂറ്റൈഡ് മരുന്നുകളുടെ ഉത്തരവാദിത്ത ഉപയോഗം ഉറപ്പാക്കാൻ അവർ ഒന്നിലധികം നടപടികൾ കൈക്കൊള്ളുകയാണ് എന്നു രേഖാമൂലം പ്രസ്താവിച്ചു.

സെമാഗ്ലൂറ്റൈഡിന്റെ അമിത ഡോസിന് പ്രത്യേക ചികിത്സയില്ല എന്നതു ശ്രദ്ധിക്കണം. ഇൻട്രാവീനൽ ഫ്ലൂയിഡുകളും ഓക്കാനം മാറാനുള്ള മരുന്നുകളുമാണ് രോഗികൾക്ക് അത്യാഹിത വിഭാഗത്തിൽ നൽകുക.
സെമാഗ്ലൂറ്റൈഡ് അമിതമായി കഴിച്ച ആളുകൾക്ക് രക്തത്തിലെ പഞ്ചസാരയുടെ കുറവോ ഹൈപ്പോഗ്ലൈസീമിയയുടെയോ ലക്ഷണങ്ങൾ നിരീക്ഷിക്കാൻ മിസോറി പോയിസൺ സെന്റർ മുന്നറിയിപ്പ് നൽകുന്നു, ഇത് അപകടകരമായേക്കാം, പ്രത്യേകിച്ച് ആരെങ്കിലും പ്രമേഹത്തിന് മറ്റ് മരുന്നുകൾ കഴിക്കുകയാണെങ്കിൽ.

സെമാഗ്ലൂറ്റൈഡ് അമിതമായി കഴിക്കുന്നതിന്റെ ലക്ഷണങ്ങൾ ഇവയാണ്.
തലകറക്കം, വിറയൽ, വിയർപ്പ്, ക്ഷോഭം അല്ലെങ്കിൽ അക്ഷമ, തലവേദന, ബലഹീനത, ക്ഷീണം, ഓക്കാനം, ഛർദ്ദി, ചിന്തകളിലെ ആശയക്കുഴപ്പം എന്നിവയാണവ. അപ്രകാരം
 ആരെങ്കിലും സെമാഗ്ലൂറ്റൈഡ് അമിതമായി കഴിച്ചിട്ടുള്ളതായി അറിഞ്ഞാൽ, പ്രാദേശിക പോയിസൺ നിയന്ത്രണ കേന്ദ്രത്തിലേക്കോ യു എസ് ദേശീയ ഹോട്ട്‌ലൈനിലേക്കോ 800-222-1222 എന്ന നമ്പറിൽ വിളിക്കാൻ വിദഗ്ധർ ഉപദേശിക്കുന്നു.
എഫ്‌ഡി‌എ, ഈ പ്രശ്‌നങ്ങൾ ഗൗരവമായി കാണുകയും സെമാഗ്ലൂറ്റൈഡിന്റെ ഓൺലൈൻ വിൽപ്പനക്കാർക്ക് ഇത് നിർത്താൻ മുന്നറിയിപ്പ് നൽകി കത്തുകൾ അയക്കുകയും ചെയ്തിട്ടുണ്ട്. കൂടാതെ, നോവോ നോർഡിസ്ക് മെഡിക്കൽ സ്പാകൾ, ക്ലിനിക്കുകൾ, ശരീരഭാരം കുറയ്ക്കൽ കേന്ദ്രങ്ങൾ എന്നിവയ്‌ക്കെതിരെ നിയമനടപടികൾ സ്വീകരിക്കുകയും, മരുന്നുകളുടെ നോക്ക്-ഓഫ് പതിപ്പുകൾ വിൽക്കുന്നത് തടയുകയും ചെയ്തിട്ടുണ്ട്.