ട്രംപ് എന്ന പേര് കേൾക്കുമ്പോൾ തന്നെ "അയ്യേ" പറഞ്ഞിരുന്ന ഒരു വലിയ വിഭാഗം ഇന്ത്യൻ-അമേരിക്കൻ വോട്ടുകൾ പോലും, 2024-ലെ പ്രസിഡൻഷ്യൽ തെരഞ്ഞെടുപ്പിൽ ഈ പ്രാവശ്യം ട്രംപിൻറെ പെട്ടിയിൽ വീണു! ഇന്ത്യൻ-അമേരിക്കക്കാരെ ട്രംപിനെ പിന്തുണയ്ക്കാൻ പ്രേരിപ്പിച്ച ഘടകങ്ങൾ വിശകലനം ചെയ്യുമ്പോൾ, വേറിട്ടുനിൽക്കുന്ന നിരവധി പ്രധാന കാരണങ്ങളുണ്ട്.

1.    ജനകീയ അടിത്തറ:
ട്രംപിൻറെ നിയമപരമായ പ്രശ്‌നങ്ങളെക്കുറിച്ചുള്ള തീവ്രമായ മാധ്യമ കവറേജ്, ട്രംപ് അന്യായമായി ടാർഗെറ്റു ചെയ്യപ്പെടുന്നു എന്ന ഒരു തോന്നൽ ജനങ്ങളിൽ ഉയർത്തി! നിയമപരമായ കേസുകൾ രൂപപ്പെടുത്തിയിരിക്കുന്നത്, നിലവിലുള്ള രാഷ്ട്രീയ വ്യവസ്ഥയ്‌ക്കെതിരെ പൊരുതുന്ന ട്രംപിനെ നിശ്ശബ്ദനാക്കാനുള്ള ഒരു സംവിധാനമാണെന്നും, ട്രംപ് അതിൻറെ ഇരയാണെന്നും ജനങ്ങൾക്ക് തോന്നി!

യഥാർത്ഥ പ്രശ്‌നങ്ങളിൽ നിന്ന് ശ്രദ്ധ വ്യതിചലിപ്പിക്കാനുള്ള ഒരു മാർഗമായാണ് രാഷ്ട്രീയപ്രേരിതമായ കേസുകളെ ജനം വീക്ഷിച്ചത്. വ്യവസ്ഥിതിയെ ഇളക്കിമറിക്കാൻ കഴിയുന്ന ഒരാളെ, പരമ്പരാഗത രീതികളെ വെല്ലുവിളിക്കാൻ തയ്യാറുള്ള ഒരാളെ ട്രംപിൽ ജനം കണ്ടു!

2.    ശക്തനായ ഒരു എതിരാളിയുടെ അഭാവം: 
കാലിഫോർണിയയുടെ അറ്റോർണി ജനറൽ, യുഎസ് സെനറ്റർ, വൈസ് പ്രസിഡന്റ് വരെ നീണ്ട രാഷ്ട്രീയ ജീവിതം ഉണ്ടായിരുന്നിട്ടും, കമലാ ഹാരിസിന് രാജ്യത്തെ നയിക്കാൻ ആവശ്യമായ അനുഭവപരിചയവും എക്സിക്യൂട്ടീവ് നേതൃത്വവും കുറവാണെന്ന് ജനത്തിന് തോന്നി. സ്ഥിരതയുള്ള, പരിചയസമ്പന്നനായ, കഠിനമായ തീരുമാനങ്ങളെടുക്കാൻ ശേഷിയുള്ള ഒരു നേതാവിനെ കമലാ ഹാരിസിൽ കാണാൻ വോട്ടർമാർക്ക് കഴിഞ്ഞില്ല.

3.    സാമ്പത്തിക നയങ്ങളും ബിസിനസ് അവസരങ്ങളും:
ഇന്ത്യൻ-അമേരിക്കൻ കമ്മ്യൂണിറ്റിയിലെ നല്ലൊരു വിഭാഗം ആളുകളും ചെറുകിട ബിസിനസ്സ് ഉടമകളോ, എഞ്ചിനീയർമാരോ, ഡോക്ടർമാരോ അല്ലെങ്കിൽ സാങ്കേതികവിദ്യയിലും വൈദ്യശാസ്ത്രത്തിലും മറ്റ് വ്യവസായങ്ങളിലും ശക്തമായ സാന്നിധ്യമറിയിക്കുന്നവരോ ആണ്. ഈ വ്യക്തികളെ സംബന്ധിച്ചിടത്തോളം, ട്രംപിൻറെ സാമ്പത്തിക നയങ്ങൾ - നികുതി വെട്ടിക്കുറയ്ക്കൽ, നിയന്ത്രണങ്ങൾ നീക്കൽ മുതലായവ അവരുടെ താൽപ്പര്യങ്ങളോട് തോളോടുതോൾ ചേർന്ന് നിൽക്കുന്നു.

കഠിനാധ്വാനത്തിനും നിക്ഷേപത്തിനും പ്രതിഫലം നൽകുന്ന ഒരു ബിസിനസ് സൗഹൃദ അന്തരീക്ഷം പരിപോഷിപ്പിക്കുന്നതിൽ ട്രംപിൻറെ "അമേരിക്ക ഫസ്റ്റ്" സാമ്പത്തിക നിലപാട് നല്ലതെന്ന് വോട്ടർമാർ കണ്ടു! കോർപ്പറേറ്റ് നികുതികൾ കുറയ്ക്കുന്നതും, ബിസിനസ്സ് നിയന്ത്രണങ്ങൾ ലളിതമാക്കാനുള്ള ശ്രമങ്ങളും ആളുകൾക്ക് പ്രയോജനം ചെയ്യുന്ന നയങ്ങളായി ജനം തിരിച്ചറിഞ്ഞു.

4.    ഇന്ത്യയുമായുള്ള നയതന്ത്ര സമീപനം:
ഇന്ത്യൻ-അമേരിക്കൻ സമൂഹം വിവിധ സംസ്ഥാനങ്ങളിൽ നിന്നും നഗരങ്ങളിൽ നിന്നും, പല സാമൂഹിക സാമ്പത്തിക പശ്ചാത്തലങ്ങളിൽ നിന്നും വരുന്നു; ചിലർ സമീപകാല കുടിയേറ്റക്കാരാണ്, മറ്റുള്ളവർ തലമുറകളായി യുഎസിൽ ഉണ്ട്!. അവരുടെ ആശങ്കകളും മുൻഗണനകളും വളരെ വ്യത്യസ്തമായിരിക്കുമ്പോൾ തന്നെ, പ്രധാനമന്ത്രി നരേന്ദ്ര മോദിയുമായുള്ള ട്രംപിൻറെ പൊതു സൗഹൃദവും, ആഗോള തലത്തിൽ ഇന്ത്യയുടെ ഉയർച്ച വർദ്ധിപ്പിക്കുന്നതിലുള്ള തന്ത്രപരമായ പ്രാധാന്യവും, ഇന്ത്യൻ-അമേരിക്കൻ സമൂഹത്തിലും ട്രംപ് തൊട്ടുകൂടാത്തവനല്ല എന്ന ഒരു ബോധ്യം ഇന്ത്യക്കാരിൽ ഉളവാക്കി.

5.    നിരാശപെടുത്തിയ ഡെമോക്രാറ്റിക് പാർട്ടി:
ഡെമോക്രാറ്റിക് പാർട്ടി തങ്ങളുടെ ആശങ്കകൾ വേണ്ടത്ര അഭിസംബോധന ചെയ്യുന്നില്ലെന്ന് ഇന്ത്യൻ-അമേരിക്കക്കാർക്ക് തോന്നി! ബൈഡൻ ഭരണകൂടം കുടിയേറ്റ നയങ്ങൾ കൈകാര്യം ചെയ്യുന്നതിലുള്ള നിരാശയും, നഗരങ്ങളിലെ കുറ്റകൃത്യങ്ങളുടെ നിരക്ക് വർദ്ധിക്കുന്നതിനെ കുറിച്ചുള്ള ആശങ്കയും, ഡെമോക്രാറ്റിക് പാർട്ടിക്ക് പ്രാധാന്യമുള്ള വിഷയങ്ങളല്ലെന്ന് ജനം തിരിച്ചറിഞ്ഞു.

പൗരന്മാർ "സ്വന്തം വീട്" എന്ന് കരുതുന്ന ഈ മഹത്തായ രാജ്യം, പുതിയ അധ്യായത്തിൻ്റെ പടിവാതിൽക്കൽ എത്തി നിൽക്കുന്നു. വരാനിരിക്കുന്ന നല്ല നാളുകളുടെ വാഗ്ദാനവും, അമേരിക്കയിലെ ഏറ്റവും മികച്ചത് ഇനിയും വരാനിരിക്കുന്നുവെന്ന പ്രതീക്ഷയും ജനങ്ങളെ മുന്നോട്ട്‌ നയിക്കുന്നു.

ആത്മവിശ്വാസത്തോടെ ഭാവിയെ അഭിമുഖീകരിക്കാൻ, സ്വപ്നങ്ങൾ സാക്ഷാത്കരിക്കാൻ, പരസ്പരം സഹായിക്കാൻ അഭിവൃദ്ധി പ്രാപിക്കാൻ, ആർക്കും ഉയരാൻ കഴിയുന്ന ഒരു സമൂഹം പുനർനിർമ്മിക്കാൻ ജനങ്ങൾ തിരഞ്ഞെടുത്ത അടുത്ത ഭരണാധികാരിക്ക് കഴിയട്ടെ!