പ്രസിദ്ധീകരിച്ചത് പരസ്യം
2025 ജനുവരി 24 വെള്ളിയാഴ്ച പുറത്തിറങ്ങിയ പത്രത്തില്‍ 2050-ല്‍ ലോകം എങ്ങനെയായിരിക്കും എന്ന ആശയത്തിലൂന്നി  പ്രസിദ്ധപ്പെടുത്തിയ സാങ്കല്പിക ഉള്ളടക്കം ജെയ്ന്‍ യൂണിവേഴ്‌സിറ്റിയുടെ കൊച്ചിയില്‍ നടക്കുന്ന 'സമ്മിറ്റ് ഓഫ് ഫ്യൂച്ചര്‍' പരിപാടിയുടെ പരസ്യമാണെന്ന് വ്യക്തമാക്കിയിരുന്നു. എന്നാല്‍, വായനക്കാരില്‍ ഇത് യഥാര്‍ത്ഥ വാര്‍ത്തയാണെന്ന തെറ്റിദ്ധാരണയുണ്ടാക്കാനിടയായതില്‍ ഖേദിക്കുന്നു.
-പത്രാധിപര്‍

ഇന്നത്തെ മാതൃഭൂമി പത്രത്തിന്റെ ഒന്നാം പേജില്‍ കണ്ട ഒരു മാപ്പിരക്കല്‍ ടോണുള്ള അറിയിപ്പാണിത്. മിക്കവാറും എല്ലാ പത്രങ്ങളുടെയും ഒന്നാം പേജില്‍ ഇത്തരത്തില്‍ ഒരു അറിയിപ്പ് കൊടുത്തിട്ടുണ്ടാവുമെന്ന് വിചാരിക്കുന്നു. അക്കിടി പറ്റിയതിനുള്ള ഈ അറിയിപ്പിന് കാരണമായത് ദേശാഭിമാനി ഒഴിച്ചുള്ള കേരളത്തിലെ ഇന്നലത്തെ ദിനപത്രങ്ങളുടെ ഒന്നാം പേജാണ്.

ഒറ്റ നോട്ടത്തില്‍ സാധാരണ പോലെ തന്നെയായിരുന്നു ഒന്നാം പേജ്. എന്നാല്‍ മെയിന്‍ സ്റ്റോറിയുടെ റ്റൈറ്റില്‍ വായിച്ചതോടു കൂടി ജനം അക്ഷരാര്‍ത്ഥത്തില്‍ ഞെട്ടി. 'നോട്ടെ, വിട; ഇനി ഡിജിറ്റല്‍ കറന്‍സി' എന്നായിരുന്നു ഹെഡ്ഡിങ്ങ്. പത്രപാരായണക്കാരുടെയെല്ലാം മനസ്സില്‍ ഒരിടിവാളു വെട്ടി. 2016 നവംബര്‍ എട്ടാം തീയതി മുതല്‍ നോട്ടു നിരോധിച്ചുകൊണ്ടുള്ള പ്രധാനമന്ത്രി നരേന്ദ്ര മോദിയുടെ അപ്രതീക്ഷിത പ്രഖ്യാപനമാണ് എല്ലാവരുമോര്‍ത്തത്. കള്ള നോട്ടുകാരുള്‍പ്പെടെ ജനം ഒന്നടങ്കം ചക്രശ്വാസം വലിച്ച സമയമായിരുന്നു അത്.

ഒന്നാം പേജിലെ മെയിന്‍ വാര്‍ത്ത ഇങ്ങനെയാണ് തുടങ്ങിയത്... 'ന്യൂഡല്‍ഹി: ഫെബ്രുവരി ഒന്നു മുതല്‍ രാജ്യത്തെ പണമിടപാടുകള്‍ പൂര്‍ണമായും ഡിജിറ്റല്‍ കറന്‍സിയിലൂടെ മാത്രമായിരിക്കുമെന്ന് റിസര്‍വ് ബാങ്ക് ഓഫ് ഇന്ത്യ. കള്ളപ്പണം പൂര്‍ണമായും തടയുക, സാമ്പത്തിക രംഗം ശക്തിപ്പെടുത്തുക എന്നീ ലക്ഷ്യങ്ങളോടെയാണ് പുതിയ പ്രഖ്യാപനമെന്ന് ആര്‍.ബി.ഐ ഗവര്‍ണര്‍ ഡോ. അരവിന്ദ് കുമാര്‍ പറഞ്ഞു. ഈ തീരുമാനം ഫെബ്രുവരി ഒന്നിന് പ്രാബല്യത്തില്‍ വരുന്നതോടെ...'

ഒരു കല്ലുകടിയോടെ വായന ഇടയ്ക്കു നിന്നു. റിസര്‍വ് ബാങ്ക് ഗവര്‍ണറുടെ പേര് അറിയാവുന്നവര്‍ ഒന്നുകൂടി വാര്‍ത്തയിലൂടെ കണ്ണോടിച്ചു. ഡോ. അരവിന്ദ് കുമാറല്ല സഞ്ജയ് മല്‍ഹോത്രയല്ലേ റിസര്‍വ് ബാങ്ക് ഗവര്‍ണര്‍..? ''അതേ...'' അദ്ദേഹത്തെ മാറ്റി പുതിയ ആളെ നിയമിച്ച കൊണ്ടുള്ള ഔദ്യോഗിക അറിയിപ്പൊന്നും വന്നിട്ടുമില്ല. പിന്നെ ഇതെങ്ങനെ സംഭവിച്ചു..? ആ പേജിലെ മറ്റു ഹെഡ്ഡിങ്ങുകള്‍ ഇങ്ങനെയായിരുന്നു...

'റോബോ മന്ത്രി @ 1' എന്ന തലക്കെട്ടിനു കീഴിലെ വാര്‍ത്ത, കേരളത്തിന് ഇത് അഭിമാന മുഹൂര്‍ത്തം. റോബോ റവന്യു മന്ത്രി സികെ-50 മന്ത്രിസഭയില്‍ ഒരു വര്‍ഷം പൂര്‍ത്തിയാക്കുന്നു എന്നു പറഞ്ഞുകൊണ്ടാണ് ആരംഭിക്കുന്നത്. കേരളത്തിലെ റവന്യൂ മന്ത്രി സി.പി.ഐയുടെ കെ രാജന്‍ ആണെന്ന് അറിയാവുന്നവര്‍ കണ്‍ഫ്യൂഷനിലായി. സി.പി.എമ്മുമായി പലകാര്യത്തിലും ഇടഞ്ഞു നില്‍ക്കുന്ന സി.പി.ഐക്കിട്ട് പിണറായി വിജയന്‍ പണികൊടുത്തോ..? അപ്പോഴാണ് 'ഗോളാന്തര കിരീടം പങ്കിട്ട് ഭൂമിയും ചൊവ്വയും' എന്ന വാര്‍ത്ത കണ്ട് ചാനല് പോയത്.

'ചൊവ്വ നോര്‍ത്ത്' എന്ന പ്ലെയ്‌സ് ലൈന്‍ വച്ച്, അതിരുകളില്ലാത്ത ആവേശപ്പോരാട്ടത്തിനൊടുവില്‍ ഗോളാന്തര ഫുട്‌ബോള്‍ കിരീടം ഭൂമിയും ചൊവ്വയും പങ്കിട്ടു എന്നും ഫിഫ ഗോളാന്തര കപ്പ് ഫൈനല്‍ കണ്ടത് 500 കോടി ആരാധകരാണെന്നും എഴുതിപ്പിടിപ്പിച്ചിരിക്കുന്നു. ചൊവ്വയിലെ റെഡ് റൂം സ്റ്റേഡിയത്തിലായിരുന്നത്രേ തീപാറുന്ന പോരാട്ടം. ഇത്രയും വായിച്ചതോടു കൂടി വാസ്തവത്തില്‍ കിളിപോയി.

എന്താണ് സംഭവമെന്നറിയാതെ പത്രം തിരിച്ചും മറിച്ചും നോക്കി. വയനാട് ജില്ലയില്‍ എ.ഐ സാങ്കേതിക വിദ്യ ഉരുള്‍പൊട്ടല്‍ പ്രവചിച്ചതു മൂലം 30,000 പേരുടെ ജീവന്‍ രക്ഷിക്കാനായി എന്നും കടലിനടിയില്‍ കരിമരുന്ന് വെടിക്കെട്ട് നടത്തിയെന്നും യുദ്ധങ്ങള്‍ ചരിത്രത്തിന്റെ ഭാഗമായി എന്നുമുള്ള വാര്‍ത്തകള്‍ പൂര്‍ണമായി വായിക്കാനുള്ള സഹനശക്തി ഇല്ലായിരുന്നു.  തലയിലെ മുടികള്‍ എഴുന്നേറ്റു നിന്നു. പിരാന്ത് പിടിക്കുമെന്ന് തോന്നിയ നിമിഷത്തിലാണ് പത്രത്തിന്റെ മൂലയ്ക്ക് ചെറിയ അക്ഷരത്തില്‍ 'മാര്‍ക്കറ്റിങ് ഫീച്ചര്‍' എന്ന് അച്ചടിച്ച് വച്ചിരിക്കുന്നത് കണ്ടത്. എന്നിട്ടും എന്താണെന്ന് സംശയം തോന്നി കലിപ്പോടെ പരതിയപ്പോഴാണ് മറ്റൊരു സംഗതി കണ്ടത്. അതിങ്ങനെ...

'അറിയിപ്പ്: കൊച്ചി ജെയിന്‍ ഡീംഡ് ടു-ബി യൂണിവേഴ്‌സിറ്റി ആതിഥേയത്വം വഹിക്കുന്ന 'ദി സമ്മിറ്റ് ഓഫ് ഫ്യൂച്ചര്‍ 2025'ന്റെ പ്രചരണാര്‍ത്ഥം സൃഷ്ടിച്ച സാങ്കല്പിക വാര്‍ത്തകളാണ് പത്രത്തിന്റെ ഒന്നാം പേജില്‍ നല്‍കിയിരിക്കുന്നത്. 2050-ല്‍ പത്രങ്ങളുടെ മുന്‍പേജ് എങ്ങനെയായിരിക്കും എന്നു ഭാവന ചെയ്യുകയാണ് ഇവിടെ. യഥാര്‍ത്ഥ സംഭവങ്ങളുമായോ റിപ്പോര്‍ട്ടുകളുമായോ ഏതെങ്കിലും വിധത്തില്‍ സാമ്യം തോന്നിയാല്‍ തികച്ചും യാദൃശ്ചികം മാത്രമാണ്. ഇതില്‍ പ്രതിപാദിക്കുന്ന  അഭിപ്രായങ്ങള്‍ക്ക് ജെയിന്‍ ഡീംഡ് ടു-ബി യൂണിവേഴ്‌സിറ്റിയുടെയോ അനുബന്ധ സ്ഥാപനങ്ങളുമായോ നിലപാടുകളുമായി ബന്ധമില്ല.'

അപ്പോള്‍ അതായിരുന്നു സംഭവം. സഭ്യമായി പറഞ്ഞാല്‍ വായനക്കാരെ പച്ചയ്ക്ക് വിഡ്ഢികളാക്കുന്ന ഒരു പരസ്യ തന്ത്രത്തിനാണ് കേരളത്തിലെ മുന്‍നിര പത്രങ്ങള്‍ ഉള്‍പ്പെടെയുള്ളവ വിധേയമായത്. ഇത് പരസ്യ ഏജന്‍സിക്കാര്‍ ഡിസൈന്‍ ചെയ്ത് കൊടുത്തതല്ല. തലക്കെട്ട് ഉള്‍പ്പെടെയുള്ള കണ്ടന്റ് ഫോട്ടോ സഹിതം ഒരേ സമയം പത്രങ്ങള്‍ക്ക് നല്‍കി അവരവരുടേതായ ഫോണ്ടും കളര്‍ സ്‌കീമും ലേ ഔട്ട് സ്റ്റൈലും ഉപയോഗിച്ച് പ്രിന്റ് ചെയ്യാന്‍ ജെയ്ന്‍ യൂണിവേഴ്‌സിറ്റിക്കാര്‍  ആവശ്യപ്പെടുകയായിരുന്നു.

കേരളത്തിലെ ഒട്ടുമിക്ക പത്രങ്ങളും ആ പരസ്യദാതാവിന്റെ ഇംഗിതം അനുസരിച്ചു. ദേശാഭിമാനി പത്രം ഇങ്ങനെ ചെയ്തില്ല. മനോരമ പത്രത്തിന്റെ വര്‍ഷവും തീയതിയും, '2050 ജനുവരി 24 വെള്ളിയാഴ്ച' എന്നാക്കിക്കൊണ്ട് ക്രെഡിബിലിറ്റി വര്‍ദ്ധിപ്പിച്ച് ജെയ്ന്‍ യൂണിവേഴ്‌സിറ്റിക്കാരോട് കൂടുതല്‍ നീതിയും കൂറും പുലര്‍ത്തി. അങ്ങനെ പൈസയ്ക്കു വേണ്ടി ഏതറ്റം വരെ പോകുമെന്ന് നാട്ടിലെ പത്രമുത്തശ്ശി ഉള്‍പ്പെടെയുള്ളവര്‍ തെളിയിച്ചു.

പത്രവായനയുടെ കാര്യത്തില്‍ പ്രബുദ്ധരായ കേരളീയര്‍ അവര്‍ക്കിഷ്ടമുള്ള പത്രങ്ങള്‍ പതിറ്റാണ്ടുകളായി വരുത്തി വായിക്കുന്നവരാണ്. കൊടുക്കുന്ന വാര്‍ത്തയും വിശകലനങ്ങളും ചിത്രങ്ങളും പിന്തുടരുന്ന നിലപാടും ഒക്കെ മനസ്സില്‍ പതിഞ്ഞതു കൊണ്ടാണ് ഓരോരുത്തരും സ്ഥിരമായി തങ്ങള്‍ ഇഷ്ടപ്പെടുന്ന പത്രങ്ങള്‍ വരുത്തുന്നത് നിര്‍ത്തലാക്കാത്തത്.

എന്നാല്‍ ഇന്നലത്തെ കലാപരിപാടി മാധ്യമധര്‍മ്മത്തിന് നിരക്കുന്നതാണോ അല്ലയോ എന്ന വിഷയത്തില്‍ വലിയ ചര്‍ച്ചയ്ക്ക് വഴിമരുന്നിട്ടു. കാശു കൊടുത്ത് പത്രം വാങ്ങിയിട്ട് കബളിപ്പിക്കപ്പെട്ടു എന്ന തോന്നല്‍ പലര്‍ക്കുമുണ്ടായി. ഇത് ഏപ്രില്‍ ഒന്നാം തീയതിയായിരുന്നുവെങ്കില്‍ അതിന്റെ ലാഘവത്തിലെടുക്കാമായിരുന്നു. എന്നാല്‍ പരസ്യം കിട്ടുന്നതിനായി എന്തു വിട്ടുവീഴ്ചയ്ക്കും തയ്യാറാണെന്ന് പത്ര മാനേജ്‌മെന്റുകള്‍ ഒരുപോലെ നിലപാടെടുത്തതില്‍ ആണ് രോഷം ആളിക്കത്തിയത്.

വാര്‍ത്താ മാധ്യമങ്ങള്‍ക്ക് പരസ്യം ആവശ്യമായ ഘടകം തന്നെയാണ്. അത് നിലനില്പിന്റെ ഭാഗം തന്നെയാണ്. വാര്‍ത്തയും പരസ്യങ്ങളുമായി ഒരു സന്തുലനം വേണം. ഇല്ലെങ്കില്‍ മാധ്യമധര്‍മം വെറും കടലാസു കച്ചവടമായി അധപതിക്കും. മുന്‍കാലങ്ങളെ അപേക്ഷിച്ച് കേരളത്തിലെ ദിനപത്രങ്ങള്‍ ഇന്ന് പുറത്തിറങ്ങുന്നത്, ഒന്നാം പേജില്‍ മാസ്റ്റ് ഹെഡിനു താഴെ ഫുള്‍ പേജ് പരസ്യവുമായാണ്. കുറേക്കാലമായി തുടരുന്ന ഈ മാര്‍ക്കറ്റിങ്ങ് രീതിയോട് ജനങ്ങള്‍ താദാത്മ്യം പ്രാപിച്ച ഘട്ടത്തിലാണ് വ്യാജ വാര്‍ത്തകളുമായി പത്രങ്ങളെത്തുന്നത്.

ഇതൊരു തമാശയായി എടുക്കാം. പക്ഷേ, പരസ്യ ദാതാവായ കൊച്ചി ജെയ്ന്‍ ഡീംഡ് ടു-ബി യൂണിവേഴ്‌സിറ്റിക്കാര്‍ പറഞ്ഞത് തങ്ങള്‍ക്ക് ഇതു സംബന്ധിച്ച് യാതൊരു ഉത്തരവാദിത്വവുമില്ലെന്നാണ്. തങ്ങള്‍ സ്വന്തം നിലയ്ക്ക് ഇങ്ങനെയൊരു ഒന്നാം പേജ് അച്ചടിച്ചിറക്കിയതായി പത്രമാനേജ്‌മെന്റും പറയുന്നില്ല. അപ്പോള്‍ വായിക്കുന്നവര്‍ക്കാണോ ഉത്തരവാദിത്വം എന്ന് കടുപ്പിച്ച് ചിന്തിക്കുന്നത് സ്വാഭാവികം. വായനക്കാര്‍ക്ക് വേണ്ടത് വാര്‍ത്തകളുടെയും വിശകലനങ്ങളുടെയും ദൃശ്യങ്ങളുടെയുമൊക്കെ വിശ്വാസ്യതയും ആധികാരികതയുമാണ്. അത് നഷ്ടപ്പെടുന്നിടത്ത് അച്ചടി നിലയ്ക്കും. ഈ തിരിച്ചറിവിലാണ് മാതൃഭൂമി പത്രം ഖേദ പ്രകടനം നടത്തിയത്.