അത് നിരവധി

ഉപരതിക്രിയകളുടെ

അനന്തരഫലമൊ

പ്രപഞ്ചത്തിന്റെ 

ഇടതടവില്ലാത്ത

നിശ്ചിതമല്ലാത്ത

നൈസ്സർഗീകമായ

ചെറുവിസ്ഫോടനമൊ?

2

അഗ്നി മോഹരഹിതമായി

അവധാനതയോടെ

കത്തിയാളട്ടെ

നിശ്ചലതയുടെ

മഹാസമാധിയിൽ;

ജലസമാധി

കൈവരിച്ച ഒരുവന്റെ ശവം

പുഴ അനവധാനതയോടെ

കടലിലേക്കെടുക്കുമ്പോൾ

ശവസമാധി.

3

ചാനലിലെ അർദ്ധജ്ഞാനികളായ

അവതാരകന്മാർ 

ആത്മാവിന്റെ ജന്മസിദ്ധമായ 

സാദ്ധ്യതകൾക്ക് നേരെ കണ്ണടയ്ക്കും

ഇത് മാദ്ധ്യമസമാധി

യുദ്ധത്തെ

അധിനിവേശത്തെ ചോദ്യം ചെയ്യാം

സമാധാനത്തെ എന്തിന്

ചോദ്യം ചെയ്യണം?

4

പരയുടെ പാല് നുകർന്ന

ഋഷികവിയുടെ 

സ്വപ്നസമാധിയിൽ നിന്ന്

ആരോഹണത്തിനും

അവരോഹണത്തിനുമതീതമായി

നാഡീതന്ത്രികൾ മീട്ടിയുള്ള

പ്രണയമിഥുനങ്ങളുടെ 

ഭോഗസമാധിയിലേക്ക് 

അധികം ദൂരമില്ല.

5

രാവിലെ മുറ്റത്ത് വിരിയും

മന്ദാരത്തിന്റെ ഹരിതവെണ്മസമാധി

സന്ധ്യയ്ക്ക് പൂത്തുലയും

കുടമുല്ലയുടെ പൂർണ്ണസൌരഭ്യസമാധി

കൃഷ്ണപരുന്തിന്റെ

വാനപ്രദക്ഷിണസമാധി

പൊട്ടക്കുളത്തിനരികെ

വെള്ളക്കൊക്കിന്റെ

ഒറ്റക്കാലൻ ചൂണ്ടസമാധി

അസംഖ്യം വേർപ്പടർപ്പിൽ

കുത്തി നിർത്തിയ

ആൽമരത്തിന്റെ

ഏകാന്തപരിനിർവ്വാണസമാധി

ഇവയൊക്കെയും

തത്വത്തിൽ ഒന്ന് തന്നെ.

സത്യാന്വേഷിക്കും സ്വപ്നദർശിക്കും

ഒരു പോലെ അനുകരണീയം.

5

മനോശരീരങ്ങളുടെ

ഇടുങ്ങിയ അന്ധകാരത്തിൽ

വർണ്ണപ്രകാശവും വിസ്തൃതിയും

വിതറുന്ന ഒരു മഴവിൽസമാധി

ശിശുവിനെന്ന പോലെ 

വൃദ്ധനും ഒരന്ത്യപ്രലോഭനമത്രെ!

6

കണ്ണോർമ്മയും പോയി

കാതോർമ്മയും പോയി

നാക്കോർമ്മയും പോയി

മൂക്കോർമ്മയും പോയി

ത്വക്കോർമ്മയും പോയി

രതിയോർമ്മയും പോയി

പകയോർമ്മയും പോയി

മൃതിയോർമ്മയും പോയി

സമാധിനിരതനായ നേരം

പിൻമുൻസ്മൃതിശ്രുതികളെല്ലാം

ഒന്നൊന്നായി സമാധിയായി 

സമാധിവിരതനായ നേരം പാർത്തേൻ

അഭേദത്തിന്റെ പുണ്യനിലയും.

7

ബുദ്ബുദം

ബോധം സരളം

ക്ഷണികം വൻമായികം;

പാവനം ബോധാതീതസമാധി

ശാന്തം മോഹനം വിശ്വമഹാത്ഭുതം;

യത്നമന്യെ ഇഷ്ടമന്യെ

അഭീഷ്ടകാര്യസിദ്ധി!

8

സന്തുഷ്ടർക്കിടയിലും

ആധി സമമായി വീതിച്ച്

സന്തുലനം നിർവ്വഹിക്കുന്ന സ്രഷ്ടാവിന്

എന്ത് സവികൽപ്പം

എന്ത് നിർവികൽപ്പം

അനർഗ്ഗളമായ ഊർജ്ജ-

സ്പന്ദനങ്ങളുടെ 

തുരീയാതീതലഹരിയിൽ

ആറാടുന്നവന് 

കൽമണ്ഡപങ്ങളെന്തിന്

സ്തുതിഗീതങ്ങളെന്തിന്?