1809 ഫെബ്രുവരി 12 നാണ് ചാൾസ് ഡാർവ്വിൻ ജനിക്കുന്നത്. ഇംഗ്ലണ്ടിലെ മിഡ് ലന്സിൽ ഷ്രൂ ബറിയെന്ന പട്ടണത്തിലായിരുന്നു അദ്ദേഹത്തിൻ്റെ ജനനം. ചരിത്രത്തിൽ മറ്റൊരു യുഗപുരുഷനും അന്നേ ദിവസം പിറവിയെടുത്തിരുന്നു . ഏബ്രഹാം ലിങ്കൺ. വൈദ്യശാസ്ത്രവും നിയമപഠനവും പഠിക്കാനായി ശ്രമിച്ചു എങ്കിലും രണ്ടും പാതിവഴിയിൽ ഉപേക്ഷിക്കുകയായിരുന്നു ഡാർവ്വിൻ . കേംബ്രിഡ്ജിൽ നിന്നും ദൈവശാസ്ത്ര ബിരുദവുമായി പുറത്തിറങ്ങിയ ആ ചെറുപ്പക്കാരൻ ഏതെങ്കിലും പള്ളി വികാരിയായി മാറേണ്ടതായിരുന്നു. HMS ബീഗിൾ എന്ന കപ്പലിൽ ലോക സഞ്ചാരത്തിനായി ക്ഷണം ലഭിച്ചില്ലായിരുന്നു എങ്കിൽ ഒരു പക്ഷേ അങ്ങിനെ തന്നെ സംഭവിക്കുമായിരുന്നു. അങ്ങിനെ തൻ്റെ ഇരുപത്തിരണ്ടാം വയസ്സിൽ ലോകസഞ്ചാരത്തിനായി ഡാർവ്വിൻ പുറപ്പെട്ടു. ആ യാത്ര പിന്നീട് ലോകത്തെ തന്നെ മാറ്റിമറിക്കാൻ കെൽപ്പുള്ള ഒരാശയത്തിൻ്റെ വികസിതമായ രൂപരേഖക്കുള്ള തുടക്കമായിരുന്നു. ബൈബിളിലെ ഉത്പത്തി സിദ്ധാന്തത്തിനു തെളിവു കണ്ടെത്താനായാണ് ബീഗിളിലെ ക്യാപ്റ്റൻ " ഫിറ്റ്സ്റോയി " സത്യത്തിൽ ഡാർവ്വിനെ കപ്പലിലേക്കു കൂട്ടുന്നത്. മതപാഠശാലയിൽ പഠിച്ച ഡാർവ്വിന് ഇക്കാര്യത്തിൽ തന്നെ സഹായിക്കാൻ കഴിയും എന്നദ്ദേഹം കരുതി. പക്ഷേ മതത്തോട് അത്രയൊന്നും മമതയില്ലാത്ത ഒരു സ്വതന്ത്ര ചിന്താഗതിക്കാരനായിരുന്നു ഡാർവ്വിൻ. 1830 ൽ ഡാർവ്വിൻ യാത്ര തുടങ്ങുമ്പോൾ തന്നെ പരിണാമമെന്ന ആശയത്തിന് പതിറ്റാണ്ടുകളുടെ പ്രായമുണ്ടായിരുന്നു. ഡാർവ്വിൻ ജനിക്കുന്നതിനു മുൻപ് തന്നെ അദ്ദേഹത്തിൻ്റെ മുത്തച്ഛൻ ഇറാമസ് ഡാർവ്വിൻ പരിണാമത്തെ കുറിച്ച് ഒരു കവിതയെഴുതിയിരുന്നു. യോഗ്യരായവരുടെ അതിജീവനം (Survival of fittest) എന്ന പ്രയോഗം ഡാർവ്വിൻ ഒരു രചനയിലും നടത്തിയിട്ടില്ല. യോഗ്യരായവരുടെ അതിജീവനം എന്ന പ്രയോഗം വരുന്നത് ഡാർവ്വിൻ്റെ " ജീവജാതികളുടെ ഉൽപത്തിയിറങ്ങി അഞ്ചു വർഷം കഴിഞ്ഞാണ്. 1864 ൽ ഇറങ്ങിയ " പ്രിൻസിപ്പൽസ് ഓഫ് ബയോളജിയിൽ " ഹെർബർട്ട് സ്പെൻസറാണ് ഈ വാക്കുകൾ ആദ്യമായി ഉപയോഗിക്കുന്നത്. പരിണാമം എന്ന വാക്കുപോലും ഡാർവ്വിൻ്റെ പുസ്തകത്തിൻ്റെ ആദ്യ പതിപ്പുകളിലില്ലായിരുന്നു. മാറ്റങ്ങളോടെയുള്ള വംശപരമ്പര എന്ന വാക്കാണ് ഡാർവ്വിൻ ഉപയോഗിച്ചത്. ഒറിജിൻ ഓഫ് സ്പീഷിസിൻ്റെ ആറാം പതിപ്പിലാണ് പരിണാമം എന്ന വാക്ക് അദ്ദേഹം ചേർക്കുന്നത്. ബീഗിൾ യാത്രയിൽ പ്രശസ്തമായ " ഗാലപ്പഗോസ് " ദ്വീപുകളിൽ വച്ചാണ് അദ്ദേഹം കുരുവികളുടെ (Finches) വൈവിധ്യങ്ങൾ ശ്രദ്ധിക്കുന്നത്. ദ്വീപുകളിൽ നിന്നും ദ്വീപുകളിലേക്കുള്ള യാത്രയിൽ ഓരോ ദ്വീപുകളിലുമുള്ള കുരുവികളുടെ കൊക്കുകളിൽ വന്ന വ്യതിയാനങ്ങൾ ഡാർവ്വിൻ ശ്രദ്ധിക്കുകയുണ്ടായി . ഓരോ സ്ഥലത്തും ഓരോ അതിജീവന തന്ത്രങ്ങളായിരുന്നു അവക്ക് വേണ്ടിയിരുന്നത്. ഇവ സൃഷ്ടിക്കപ്പെട്ടതല്ല , മറിച്ച് തങ്ങൾക്കു പറ്റിയ രീതിയിൽ കുരുവികൾ സ്വയം സൃഷ്ടിക്കപ്പെട്ടതയായിരുന്നു. പക്ഷേ ഇത് ഡാർവ്വിനെക്കാൾ കൂടുതൽ കൃത്യമായി മനസ്സിലാക്കിയത് അദ്ദേഹത്തിൻ്റെ സുഹൃത്തും പക്ഷി ശാസ്ത്രജ്ഞനുമായി ജോൺ ഗൂൾഡാണ്. ഇന്ന് ഡാർവ്വിൻ്റെ 216മത് ജൻമവാർഷികമാണ്. പരിണാമം ഇന്ന് ഒരു സിദ്ധാന്തമല്ല. ഒരു വസ്തുതയാണ്. മെഡിക്കൽ സയൻസ് പ്രവർത്തിക്കുന്നതു തന്നെ പരിണാമത്തിൻ്റെ അടിസ്ഥാന തത്വം കൊണ്ടാണ്. മതപുരോഹിതനായി ഒരിടവകയിൽ ജീവിച്ച് മരിച്ചു പോകുമായിരുന്ന ഒരു മനുഷ്യൻ ഇന്നും ലോകത്ത് ചർച്ച ചെയ്യപ്പെടുന്നു. നൂറ്റാണ്ടുകൾക്കു ശേഷവും . --------------------- എസൻസ് ഗ്ലോബൽ കോട്ടയം യൂണിറ്റ് , 2025 മാർച്ച് 23 ഞായറാഴ്ച്ച , കോട്ടയം നഗരത്തിൽ സംഘടിപ്പിക്കുന്ന നിരീശ്വരവാദ സമ്മേളനത്തിലേക്ക് ഏവർക്കും സ്വാഗതം . # Finches 2k25"