ഒരു ദശാബ്ദത്തിനിടയിലെ ഏറ്റവും വലിയ സാമ്പത്തിക തകർച്ചയിൽ, അമേരിക്കൻ പ്രസിഡൻ്റ് ഡൊണാൾഡ് ട്രംപ് ബദൽ താരിഫുകൾ പ്രഖ്യാപിച്ചതിനെ തുടർന്ന് ലോകത്തിലെ ഏറ്റവും സമ്പന്നരായ 500 പേരുടെ ആകെ സമ്പത്തിൽ 208 ബില്യൺ ഡോളറിൻ്റെ കുറവാണു ഉണ്ടായിരിക്കുന്നത്.

ഫേസ്ബുക്ക്, മെറ്റ എന്നിവയുടെ സ്ഥാപകനായ മാർക്ക് സക്കർബർഗിനാണ് ഏറ്റവും കൂടുതൽ നഷ്ടം സംഭവിച്ചത്. അദ്ദേഹത്തിൻ്റെ സമ്പത്തിൽ 17.9 ബില്യൺ ഡോളറിൻ്റെ കുറവുണ്ടായി,

ബ്ലൂംബെർഗ് ശതകോടീശ്വര സൂചികയുടെ 13 വർഷത്തെ ചരിത്രത്തിലെ നാലാമത്തെ  ഇടിവാണിത്. കോവിഡ്-19 മഹാമാരിയുടെ പാരമ്യത്തിനു  ശേഷമുള്ള ഏറ്റവും വലിയ ഇടിവും ഇതാണ് . താരിഫുകൾ പ്രഖ്യാപിച്ചതിന് ശേഷം, ശതകോടീശ്വരന്മാരുടെ പട്ടികയിൽ ഏറ്റവും കൂടുതൽ ബാധിച്ചതും അമേരിക്കയിൽ നിന്നുള്ളവരെയാണ്.

ആമസോണിൻ്റെ ജെഫ് ബെസോസിനും കനത്ത നഷ്ടം നേരിട്ടു. 2022 ഏപ്രിലിന് ശേഷമുള്ള കമ്പനിയുടെ ഏറ്റവും വലിയ ഇടിവായ ഒമ്പത് ശതമാനം ഓഹരി ഇടിവാണ് അദ്ദേഹത്തിന് 15.9 ബില്യൺ ഡോളറിൻ്റെ വ്യക്തിപരമായ നഷ്ടം വരുത്തിയത്. ടെസ്‌ലയുടെ ഓഹരികൾ 5.5 ശതമാനം ഇടിഞ്ഞതിനെ തുടർന്ന് ട്രംപിൻ്റെ അടുത്ത സുഹൃത്തും സർക്കാർ ഉപദേഷ്ടാവുമായ ഇലോൺ മസ്‌കിന് 11 ബില്യൺ ഡോളർ നഷ്ടപ്പെട്ടു.

മൈക്കിൾ ഡെൽ (9.53 ബില്യൺ ഡോളർ), ലാറി എലിസൺ (8.1 ബില്യൺ ഡോളർ), ജെൻസൺ ഹുവാങ് (7.36 ബില്യൺ ഡോളർ), ലാറി പേജ് (4.79 ബില്യൺ ഡോളർ), സെർജി ബ്രിൻ (4.46 ബില്യൺ ഡോളർ), തോമസ് പീറ്റർഫി (4.06 ബില്യൺ ഡോളർ) എന്നിവരാണ് സമ്പത്തിൽ വലിയ ഇടിവ് നേരിട്ട മറ്റ് അമേരിക്കൻ ശതകോടീശ്വരന്മാർ.

സമ്പത്തിൽ കാര്യമായ ഇടിവ് നേരിട്ട ശതകോടീശ്വരന്മാരിൽ അമേരിക്കയ്ക്ക് പുറത്തുനിന്നുള്ള ഒരേയൊരു വ്യക്തി ഫ്രാൻസിൽ നിന്നുള്ള ബെർണാഡ് അർനോൾട്ടാണ്. യൂറോപ്യൻ യൂണിയൻ അമേരിക്കയിലേക്ക് പോകുന്ന എല്ലാ ഉൽപ്പന്നങ്ങൾക്കും 20 ശതമാനം ഫ്ലാറ്റ് താരിഫ് പ്രതീക്ഷിക്കുന്നു, ഇത് മദ്യം, ആഡംബര വസ്തുക്കൾ എന്നിവയുടെ കയറ്റുമതിയെ ദോഷകരമായി ബാധിക്കും. ക്രിസ്റ്റ്യൻ ഡിയോർ, ബുൾഗാരി, ലോറോ പിയാന തുടങ്ങിയ ബ്രാൻഡുകൾ സ്വന്തമായുള്ള അർനോൾട്ടിൻ്റെ എൽവിഎംഎച്ച് കമ്പനിയുടെ ഓഹരികൾ പാരീസിൽ ഇടിഞ്ഞു. ഇത് യൂറോപ്പിലെ ഏറ്റവും സമ്പന്നനായ വ്യക്തിയുടെ ആസ്തിയിൽ നിന്ന് 6 ബില്യൺ ഡോളർ കുറവുണ്ടാക്കി

"ഞങ്ങളെ മോശമായി പരിഗണിക്കുന്ന രാജ്യങ്ങൾ" എന്ന് ട്രംപ് വിശേഷിപ്പിച്ച ചില രാജ്യങ്ങൾക്ക് ഏറ്റവും ഉയർന്ന താരിഫുകൾ അദ്ദേഹം നീക്കിവെച്ചു. അതിൽ ചൈനയിൽ നിന്നുള്ള സാധനങ്ങൾക്ക് 34 ശതമാനം അധികം താരിഫ് ഉൾപ്പെടുന്നു - ഇത് പുതിയ അധിക താരിഫ് നിരക്ക് 54 ശതമാനമായി ഉയർത്തി. യൂറോപ്യൻ യൂണിയന് 20 ശതമാനവും ജപ്പാന് 24 ശതമാനവുമായിരുന്നു താരിഫ്.

Billionaires lost $208 billion after Trump's tariff announcement