സിത്താരയുടെ ശവദാഹം കഴിഞ്ഞു . അവളുടെ അച്ഛൻ  തിരികെ  വന്നു  ജനനിയുടെ സമീപമിരുന്നു . ചെറിയച്ഛൻ അഭിനന്ദനുമായി സംഭാഷണത്തിൽ ഏർപ്പെട്ടു . 

മിത്ര അമ്മയോടും  സുമേദിനോടുമൊപ്പം കുറച്ചു സമയം ചിലവഴിച്ചു .

വളരെ ബുദ്ധിമുട്ടിയാണ് അമ്മ അവനു രണ്ട് ഇഡ്‌ലി കൊടുത്തത് .

അമ്മയെയും  സുമേദിനെയും അഭിനന്ദൻ തിരികെ പോകുമ്പോൾ വീട്ടിൽ കൊണ്ടാക്കാമെന്നു പറഞ്ഞു . 

നാളെ വരാമെന്നു പറഞ്ഞു സംപ്രീതിയും യാത്രയായി .

ഡോക്ടർ ചന്ദ്രലേഖ ആരും കേൾക്കാതെ മിത്രയോടു പറഞ്ഞു 

" ഓട്ടോപ്സി റിസൾട്ട് രണ്ടു ദിവസത്തിനകം ലഭിക്കും , ആർക്കും ഇവിടെ ഒരു സംശയവും തോന്നരുത് . ഡോക്ടർ ഭാസ്കറും  അഭിനന്ദനും ആൾറെഡി DIG യെ കണ്ടു .മിത്ര പറഞ്ഞത് പോലെ ഇതൊക്കെ വെളിയിൽ അറിഞ്ഞാൽ അത് ഇത്രയും വർഷം ഭംഗിയായി കൊണ്ടുപോയ ഈ ഇൻസ്റ്റിട്യൂട്ടിന്റെ റെപ്യൂറ്റേഷനെ ബാധിക്കും .

ആരും വെളിയിൽ അറിയാതെ DIG രണ്ടു ഓഫീസെഴ്സിനെ നിയമിച്ചിട്ടുണ്ട് . അവർ ഇവിടെ ഉണ്ടായിരുന്നു. ഇന്നലെയും ഇന്നും , നാളെയുമായി അവർ ഓരോരുത്തരെയും ചോദ്യം ചെയ്യും ."

സംഘമിത്രക്കു രണ്ടു ദിവസമായി തീരെ സമാധാനമില്ല . ഇതുകൂടി കേട്ടപ്പോൾ വയറ്റിൽ നിന്നും ഒരു കത്തൽ :

എങ്ങനെ ഇതിനെയെല്ലാം അതിജീവിക്കും .

" എന്താ മിത്ര ആലോചിക്കുന്നത് ..? ഡോക്ടർ അവളുടെ മുഖഭാവം കണ്ടു ചോദിച്ചു .

" രണ്ടു ദിവസമായി വല്ലാത്ത ഒരു ഭയം . ആരായിരിക്കും  എന്തിനായിരിക്കും  ഈ കുട്ടികളോട് ഇങ്ങനെ ചെയ്യുന്നത് ? 

അതും ജനനി , തന്റെ മകൾക്കുവേണ്ടി മാത്രമല്ല ഗോഡ്സ് ഹോം ആരംഭിച്ചത് . ഇത് അടച്ചുപൂട്ടിയാൽ എല്ലാ കുഞ്ഞുങ്ങളെയും അത് ബാധിക്കില്ലേ.. ?"

" ഭൂമിയിലെ ഏറ്റവും സങ്കീർണ്ണമായ യന്ത്രമാണ് മനുഷ്യ മനസ്സ്. എല്ലാ ചിന്തകളുടെയും പെരുമാറ്റത്തിന്റെയും ഉറവിടം അതാണ് . അതിൽ കൂടി കടന്നുപോകുന്നത് എന്താണെന്ന് 

പ്രസിദ്ധരായ  മനഃശാസ്ത്രജ്ഞർക്കു പോലും കണ്ടുപിടിക്കാൻ സാധിക്കില്ല .

let the police do their job . നമ്മൾ സഹകരിച്ചാൽ മതി.. "

" ശരി.. " 

" ഞങ്ങൾ ഇറങ്ങുകയാണ്. ഓട്ടോപ്സി റിസൾട്ട് വരുമ്പോൾ ഡോക്ടർ സീതാലക്ഷ്മി വിവരം അറിയിക്കും . ഞങ്ങൾ നാളെ വരാം .

എന്തെങ്കിലും ആവശ്യമുണ്ടെങ്കിൽ വിളിച്ചാൽ മതി . രണ്ടുമൂന്നു കുട്ടികൾക്കുള്ള മരുന്നു ഞാൻ ഡിസ്പെൻസറിയിൽ ജാനറ്റ് നഴ്സിനെ ഏൽപ്പിച്ചിട്ടുണ്ട്.. "

ഡോക്ടർ ചന്ദ്രലേഖ , ജനനിയുടെ കൈപിടിച്ച്  യാത്ര പറഞ്ഞു വണ്ടിയിൽ കയറി  യാത്രയായി .

കുറച്ചു സമയത്തിനകം , സിത്താരയുടെ അച്ഛനും  കൊച്ചച്ഛനും .. അവരും നാളെ 

വരാമെന്നു പറഞ്ഞു .

അഭിനന്ദൻ സംഘമിത്രയുടെ കൈയിൽനിന്നും  ഫ്ലാറ്റിന്റെ  താക്കോൽ വാങ്ങി . അമ്മയെയും  സുമേദിനെയും വണ്ടിയിൽ കയറ്റി , കൊണ്ടുപോയി .  രാത്രിയിൽ വരാമെന്നയാൾ പറഞ്ഞപ്പോൾ മിത്ര വിലക്കി .

അതിനു മറുപടി പറയാതെ , അയാൾ വണ്ടി സ്റ്റാർട്ട് ചെയ്തു .

വിനോദിനിചേച്ചിയും , പദ്മാക്കയും എല്ലായിടവും വൃത്തിയാക്കുന്നു . 

പൂക്കൾ എല്ലായിടത്തും ചിതറിക്കിടപ്പുണ്ട് . 

സംഘമിത്ര ജനനിയുടെ മുറിയിലേക്ക് പോയി . 

അവർ കിടക്കുയാണ് .  കിടക്കവിരി മാറ്റാമെന്ന് പറഞ്ഞിട്ടവർ സമ്മതിച്ചില്ല .

ആ മുറിയിലെ ചെറിയ സോഫയിൽ തലചായ്ച്ചു  മിത്രയിരുന്നു .

" നിനക്ക് അമ്മയുടെ കൂടെ വീട്ടിൽ പോകാൻ വയ്യായിരുന്നോ .. ? കുറച്ചു ദിവസമായില്ലേ ഈ അലച്ചിൽ.. "

" അത് കുഴപ്പമില്ല , രണ്ടു ദിവസം കഴിയട്ടെ .. "

ജനനി കണ്ണടച്ച് കിടന്നു .

എന്തൊക്കെ ആയിരിക്കും ആ മനസ്സിൽ കൂടി കടന്നു പോകുന്നത് ? 

തീർച്ചയായും അവരെ  വേദനയിൽ ആഴ്ത്തുന്ന ഒരു ചോദ്യമുണ്ടാവും   കറുപ്പുനിറം വീണ ആ കൺതടത്തിൽ .

അനുഭവങ്ങളുടെ കാഴ്ചകൾ നിഴലിച്ചു നില്ക്കുന്ന, കണ്ണുകളിലേക്ക് ആർദ്രത പടർത്തുന്ന ഒരു സത്യം സിത്താര , അവൾ ഇനി ഇല്ല .

ഇത്രയും കാലം ജനനി  ജീവിച്ചു തീരുകയായിരുന്നോ അതോ മകൾക്കായി മരിച്ചു തീരുകയായിരുന്നോയെന്ന്. 

ഒരു പക്ഷെ നിസ്വാർത്ഥമായ ഈ  മനസ്സിന് ഈ ലോകത്ത് ബാക്കി ജീവിതം ജീവിച്ചു തീർക്കാനാകുമോ .. ?

പിന്നെ മറ്റൊരു കാര്യം ചിന്തിക്കാൻ സത്യത്തിൽ പേടി തോന്നുന്നു.

ആ നിമിഷത്തിലേക്ക് എത്തിപ്പെട്ടാൽ , ദൈവമേ ആരായിരിക്കും ഈ കൊടുംപാതകം ചെയ്തത് ? എന്തിനു ?

മെഹുറുനിഷ ആയിരിക്കില്ല എന്നു മനസ്സുപറഞ്ഞു .

സിസ്റ്റർ ജാനെറ്റ് ? അവരാണ് മരുന്നെടുത്തു കൊടുക്കുന്നത് . പക്ഷെ അവരെന്തിനു... ?

ഡോക്ടർ ചന്ദ്രലേഖ പറഞ്ഞതുമാതിരി മനസ്സുപോലെ സങ്കീർണ്ണവും നിഗൂഢവുമായ ഒരു കാര്യത്തെക്കുറിച്ച്  നമുക്ക് എങ്ങനെ പ്രവചിക്കാൻ  സാധിക്കും ..?

ഒരുനിമിഷം മയക്കത്തിലേക്ക് വീണപ്പോൾ ജനനി ചോദിച്ചു .

" മിത്ര ..നമ്മുടെ കുഞ്ഞിനെ ആരെങ്കിലും അറിഞ്ഞോണ്ട് അപായപ്പെടുത്തിയാതാണോ ? അവൾ എന്ത് ദ്രോഹമാണ് ചെയ്തതു ?

സത്യത്തിൽ കുറച്ചു ദിവസമായി  മിത്രയും ഇതിനുത്തരം തേടുകയായിരുന്നു .

കുറച്ചു കാലം മുമ്പ് വായിച്ച ഒരു കാര്യം ഓർമവന്നു .

സ്പെഷ്യൽ ചിൽഡ്രൻ , അവർ ദൈവത്തിനു സ്പെഷ്യലാണ് . അവരെ നോക്കാൻ പ്രാപ്തിയുള്ളവരുടെ കൈയ്യിലേ അവരെ ദൈവം ഏൽപിക്കൂ .. പിന്നെ വളരെ പരിണമിച്ച ആത്മാക്കൾ, അവർ വിശ്രമ ജീവിതത്തിനു ഭൂമിയിലേക്ക് വരുമെന്ന് - അവരാണ് സ്പെഷ്യൽ ചിൽഡ്രൻ.

അവർക്കൊരു നിയോഗമുണ്ട് . സിത്താര അവളുടെ നിയോഗം കഴിഞ്ഞു മടങ്ങി.

മറ്റൊരുപാട് ആത്മാക്കൾക്ക് തങ്ങാൻ ഒരിടമൊരുക്കി , അവൾ യാത്രയായി . പക്ഷെ അവളുടെ ഈ ലോകത്തെ വാസം ഹ്രസ്വമാക്കാൻ ആർക്കും അവകാശമില്ല .

ഈ അവസരത്തിൽ ഈ കാര്യം ജനനിയോട് പറയുന്നത് ഉചിതമല്ല .

" സത്യമായിട്ടും ചേച്ചി ചോദിച്ച ഈ ചോദ്യം ഞാൻ എന്നോട് തന്നെ ചോദിക്കുകയാണ്.. "

" മെഹറുനിഷ അല്ലെന്നു എനിക്ക് തോന്നുന്നു.. "

"ഉം , എനിക്കും .."

അഭിനന്ദനും അമ്മയും ആ സമയത്ത് അവിടേക്കു വന്നു . ഭാഗ്യത്തിന് സ്കൂളിൽ വീൽചെയർ സൗകര്യമുണ്ട് .

രാത്രിക്കുള്ള ഭക്ഷണം അവർ ഏർപ്പാടാക്കി . കൂടാതെ ജനനിക്കും  മിത്രക്കും കുറച്ചു പഴങ്ങളും ഭക്ഷണവും കൈയിൽ കൊണ്ടുവന്നു .

ജനനി ഭക്ഷണം കഴിച്ചിട്ട് രണ്ടു ദിവസമാകുന്നു . അഭിനന്ദൻറെ അമ്മ ഭക്ഷണം കഴിക്കാൻ പറഞ്ഞിട്ടും അവർ കൂട്ടാക്കിയില്ല . അപ്പോൾ ആയമ്മ പറഞ്ഞു ..

"  ജനനി ഭക്ഷണം കഴിക്കാതെ ഞാൻ ഇവിടെ നിന്നും പോകില്ല.

ഞാനും ഇവിടെ താമസിക്കും.

പിന്നെ   ഇങ്ങനെയിരുന്നാൽ സുഖമില്ലാതെ ആകും .

നമ്മളെ വിട്ടുപോയ ആ കുഞ്ഞു , അവളുടെ പ്രിയപ്പെട്ട അമ്മ സുഖമില്ലാതെ ആകുന്നതു കാണാൻ ആഗ്രഹിക്കുന്നുണ്ടോ ?

" എന്തിനാ അമ്മേ ഞാനിനി ജീവിക്കുന്നത്.. ?"

" ജനനവും , മരണവും നമ്മുടെ കൈയിൽ ആണോ , ഇനിയും എത്രയോ കാര്യങ്ങൾ ചെയ്തു തീർക്കാനുണ്ട് .

ശരിയാ,

ഈ സ്കൂൾ തുടങ്ങിയത്  മോൾക്ക് വേണ്ടിയാണ് . അവളുടെ സ്മരണ നമ്മൾ നിലനിർത്തണം .

ഇപ്പോൾ  ഒന്നും പറയേണ്ട.

കുറച്ചു കഞ്ഞി എങ്കിലും കുടിക്കൂ.. "

സ്വന്തം അമ്മയെ ആണ് അപ്പോൾ ജനനിക്കു ഓർമ്മവന്നത്  .

അവർ എഴുന്നേറ്റു കുറച്ചു കഞ്ഞി കുടിച്ചു . 

അമ്മ നിർബന്ധിച്ച് ഒരു പഴവും കഴിപ്പിച്ചു .

കുറച്ചു സമയം അവർ അവിടെ ചിലവിട്ടു . 

സുമേദിനും അമ്മക്കുമുള്ള ഭക്ഷണ കാര്യങ്ങൾ ഏർപ്പാടാക്കിയെന്ന് അഭിനന്ദൻ അറിയിച്ചു .

അവരെ യാത്രയാക്കാൻ പുറത്തേക്കിറങ്ങിയപ്പോൾ , ഡോക്ടർ സീതാലക്ഷമിയുടെ ഫോൺ വന്നു .

" റോഡെന്റിസൈഡ്  പോയ്സണിങ് അതായത് , എലിവിഷം കൊണ്ടുള്ള മരണം.. "

അതാണ് സിത്താരക്ക് സംഭവിച്ചത് .

തുടരും...