പുതിയ അറിവുകളും സാങ്കേതിക വിദ്യകളും പ്രായോഗിക രീതികളും തുടര്‍ച്ചയായി മാറിക്കൊണ്ടിരിക്കുന്ന മേഖലയാണ് ആരോഗ്യ സംരക്ഷണ രംഗം. പ്രാക്ടീസ് ചെയ്യുന്ന നഴ്‌സുമാര്‍ക്ക് പുതുമകളെ പരിചയപ്പെടുത്തി അവരെ അറിവിന്റെ മുന്നില്‍ നിര്‍ത്തുകയെന്ന ലക്ഷ്യത്തോടെ ഇന്ത്യന്‍ നഴ്‌സസ് അസോസിയേഷന്‍ ഓഫ് ന്യൂ യോര്‍ക്ക് (ഐനാനി) സംഘടിപ്പിച്ച ഈ വര്‍ഷത്തെ ആദ്യത്തെ തുടര്‍ വിദ്യാഭ്യാസ ദിനം അനേകം നഴ്‌സുമാര്‍ക്ക് ഔദ്യോഗികമായി സമ്പുഷ്ടവും പ്രായോഗികമായി കൂടുതല്‍ വിജ്ഞാനപ്രദവുമായി. വിവിധ വിഷയങ്ങളില്‍ വൈദഗ്ധ്യവും നിപുണതയും തെളിയിച്ചിട്ടുള്ള വ്യക്തികളും സ്ഥാപനവും ആഴമുള്ള തുട ര്വിദ്യാഭ്യാസം നല്‍കുക വഴി നഴ്‌സുമാര്‍ക്ക് അവരുടെ ജോലിയില്‍ കൂടുതല്‍ ആത്മവിശ്വാസം പകരുകയും പുതിയ അവസരങ്ങള്‍ക്കുള്ള വഴി തുറക്കാന്‍ സഹായിക്കുകയും ചെയ്തു. 

നോര്‍ത്ത്-വെല്‍ ഹെല്‍ത് സിസ്റ്റത്തില്‍ കാര്‍ഡിയോളജി നഴ്‌സ് പ്രാക്ടീഷണര്‍ ആയി സേവനം ചെയ്യുന്ന ഗ്രേസ് ഗീവര്‍ഗീസ് സ്ത്രീകള്‍ നേരിടുന്ന ഹൃദ്രോഗ ബാധയെ കുറിച്ചും അതിനുള്ള ഉയര്‍ന്ന സാധ്യതകളെ കുറിച്ചും പ്രഭാഷണം നടത്തി. കാന്‌സറിനേക്കാള്‍ കൂടുതല്‍ സ്ത്രീകള്‍ ഹൃദ്രോഗ ബാധ മൂലം  മരിക്കുന്നുണ്ട്.  മൂന്നില്‍ രണ്ടു സ്ത്രീകള്‍ ഒന്നോ അതിലധികമോ ഹൃദ്രോഗ ബാധയ്ക്കുള്ള ഘടകങ്ങളുള്ളവരാണ്. ഇതാകട്ടെ ഓരോ വയസ്സ് കൂടുമ്പോഴും  വര്ധിച്ചുകൊണ്ടിരിക്കുന്നു.   പുരുഷന്മാരുടേതിനേക്കാള്‍ വലുപ്പത്തില്‍ ചെറിയ ഹൃദയവും രക്തധമനികളുമുള്ളവരാണ് സ്ത്രീകള്‍. അതുപോലെ തന്നെ ഹൃദയത്തിന്റെയും ധമനികളുടെയും ഭിത്തികളാകട്ടെ പുരുഷന്മാരുടേതിനേക്കാള്‍ കനം കുറഞ്ഞതുമാണ്.  എസ്‌ട്രോജന് എന്ന ഹോര്‍മോണ്‍ സ്ത്രീകള്‍ക്ക് ഹൃദ്രോഗത്തെ തടയാന്‍ കുറെ സഹായിക്കുന്നുണ്ട്. പക്ഷെ മെനോപോസ് ആകുന്നതോടെ ഹോര്‍മോണിന്റെ അളവ് കുറയുകയും ഇല്ലാതാകുകയും ചെയ്യുന്നതോടെ ഹൃദ്രോഗ സാധ്യതയ്ക്കുള്ള റിസ്‌ക് കൂടും.   സ്ത്രീകളുടെ ഹൃദയ ഭിത്തികള്‍ക്ക് ഓക്‌സിജന്‍ എത്തിച്ചുകൊടുക്കുന്ന രക്തധമനികള്‍ കൂടുതല്‍ ചെറുതായതിനാല്‍ അവര്‍ക്കുണ്ടാകുന്ന കൊറോണറി മൈക്രോവാസ്‌ക്കുലര്‍ ഡിസീസ് കണ്ടുപിടിക്കാന്‍ തന്നെ പ്രയാസമുണ്ടാക്കും.   ഈ  അവസ്ഥയുടെ  ഗൗരവത്തെ പലപ്പോഴും തിരിച്ചറിയാതിരിക്കുകയോ ഡയഗ്നോസ് ചെയ്യാതിരിക്കുകയോ ചെയ്യുന്ന പ്രവണതയാണ് ഇന്നുള്ളത്.     ഹൃദയസംബന്ധമായ രോഗാവസ്ഥയുടെ ആദ്യലക്ഷണങ്ങളും അടയാളങ്ങളും രോഗാവസ്ഥയെയും നേരത്തെ തന്നെ കണ്ടുപിടിക്കുന്നതിന് ഇന്ന് ഏറ്റവും പുതുതായി ഉപയോഗിക്കുന്ന മാര്‍ഗ്ഗങ്ങളും ചികിത്സാക്രമങ്ങളും ഗ്രേസ് വിശദമായി നഴ്‌സുമാരും നേഴ്‌സ് പ്രാക്ടീഷണര്മാരും നിറഞ്ഞ സദസ്സിന് വിവരിച്ചു. 

അടുത്ത വിഷയം ഇന്ത്യയും അമേരിക്കയും തുടങ്ങി ലോകത്തിലെ മിക്കവാറും എല്ലാ രാജ്യങ്ങളിലും വ്യാപിച്ചുകിടക്കുന്ന ആധുനിക കാലത്തെ അടിമത്തമായി അറിയപ്പെടുന്ന   മനുഷ്യക്കടത്തായിരുന്നു. ന്യൂ യോര്‍ക്ക് സ്റ്റേറ്റിലെ ഏറ്റവും വലിയ സ്വകാര്യ ആരോഗ്യ സംരക്ഷണ സംഘടനയായ  നോര്‍ത്ത്-വെല്‍ ഹെല്‍ത്തിനുവേണ്ടി അതിന്റെ ഇന്‍സ്റ്റിറ്റ്യൂട്ട് ഓഫ് കമ്മ്യൂണിറ്റി വെല്‍നെസ്സ് ആന്‍ഡ് ഹെല്‍ത്തിന്റെ സീനിയര്‍ പ്രോഗ്രാം മാനേജര്‍ വിലോണ്ട ഗ്രീന്‍ ക്ലാസ്സെടുത്തു. 'നമ്മുടെ കാലത്തെ ഏറ്റവും തെറ്റിദ്ധരിക്കപ്പെട്ട പൊതുജനാരോഗ്യ, സാമൂഹിക നീതി പ്രശ്‌നങ്ങളില്‍ ഒന്നാണ് മനുഷ്യക്കടത്ത്.' ലൈംഗിക ചൂഷണത്തിനും ലൈംഗിക കച്ചവടത്തിനും നിര്‍ബ്ബന്ധിത തൊഴില്‍ ചൂഷണത്തിനും വേണ്ടി മനുഷ്യരെ വസ്തുക്കളാക്കി ഉപയോഗിക്കുന്ന ഈ അക്രമ കുറ്റകൃത്യം തിരിച്ചറിയാന്‍ കഴിയാത്തവിധം നമുക്കു ചുറ്റും നടക്കുന്നുണ്ട്. ഭാര്യാഭര്‍ത്താക്കന്മാരടക്കം പ്രണയ പങ്കാളികളും  മാതാപിതാക്കന്മാരും  വരെ മനുഷ്യക്കടത്തില്‍ കുറ്റവാളികളാണെന്ന് വസ്തുതകള്‍ കാണിക്കുന്നു. ഒരു ആഗോള പൊതുജനാരോഗ്യ പ്രതിസന്ധി ആയി മാറിയ മനുഷ്യക്കടത്തെന്ന അക്രമ കുറ്റകൃത്യങ്ങളെ കുറക്കുന്നതിന് സമൂഹത്തിലെ ഓരോ വ്യക്തിക്കും  സഹായിക്കാനാകുമെന്ന്  വിലോണ്ട പറഞ്ഞു. മനുഷ്യക്കടത്തിനിരയായവരില്‍ 88 ശതമാനം പേര് ആരോഗ്യ പ്രശ്‌നങ്ങളുമായി ഹോസ്പിറ്റലുകളിലും മറ്റു ചികിത്സാ സ്ഥലങ്ങളിലും എത്തുന്നുണ്ടെങ്കിലും അവരെ ചികില്‌സിക്കുന്നവര്‍ക്ക് അത് തിരിച്ചറിയാനുള്ള പരിശീലനമോ അറിവോ ഇല്ലാത്തതിനാല്‍ മിക്കവാറും കേസുകള്‍ കൈ വിട്ടു പോകുകയാണ് ചെയ്യുന്നത്. സംഭവങ്ങളെ തിരിച്ചറിയുന്നതിനുള്ള സൂചനകളും കൂടുതല്‍ വിവരങ്ങളെടുക്കുന്നതിനുള്ള വഴികളും അവ റിപ്പോര്‍ട്ട് ചെയ്യുന്നതിനുള്ള സങ്കേതങ്ങളും വിലോണ്ട വിശദീകരിച്ചു. 
അമേരിക്കയില്‍ ഏകദേശം മുപ്പത് ദശലക്ഷം ആളുകള്‍ക്ക് സ്ലീപ് അപ്നിയ എന്നറിയപ്പെടുന്ന ഉറക്കത്തിനിടയ്ക്കുള്ള ശ്വാസ തടസ്സം ഉണ്ടെന്നാണ് കണക്ക്. ഉറക്കത്തിനിടയ്ക്ക് ശ്വാസം നില്‍ക്കുകയും ഒരു ഇടവേളയ്ക്കു ശേഷം വീണ്ടും ശ്വാസോഛ്വാസം വീണ്ടും തുടങ്ങുകയും ചെയ്യുന്ന ഈ അസുഖം പലരും അറിയാറില്ല. പക്ഷെ, ചികില്‍സിച്ചില്ലെങ്കില്‍ പല മറ്റു തരത്തിലുള്ള അസുഖങ്ങളിലേക്ക് നയിക്കാന്‍ വലിയ സാധ്യതയുണ്ട്. ഹൃദ്രോഗം, ഡയബെറ്റിസ്, ന്യൂറോളജിക്കല്‍ പ്രശ്‌നങ്ങള്‍ എന്നിവ അവയില്‍ പെടുന്നു. പ്രമുഖ സ്ലീപ് സ്റ്റഡി വിദഗ്ധനയായ ഡോ. നരേന്ദ്ര സിങ് സ്ലീപ് അപ്നിയയുടെ ശരീരഘടനാപരമായ കാരണങ്ങളും ശരീര പ്രകൃതിയില്‍ നിന്ന് തുടങ്ങുന്ന സൂചനകളും അടയാളങ്ങളും ഭവിഷ്യത്തുകളും ഈ അസുഖം കണ്ടുപിടിച്ചു സ്ഥിരീകരിക്കാനുള്ള രീതികളും ചികിത്സാ മാര്‍ഗ്ഗങ്ങളും വിശദീകരിച്ചുകൊണ്ട് ക്ലാസ്സെടുത്തു. 

ഇന്ത്യക്കാരുടെ ഒരു നഴ്‌സിംഗ് സംഘടന എന്ന നിലയില്‍ ചെയ്ത സേവനങ്ങളെ അംഗീകരിച്ചുകൊണ്ട് തുടര്‍ പ്രവര്‍ത്തനങ്ങള്‍ക്ക് ഏഷ്യന്‍ അമേരിക്കന്‍ പസിഫിക് ഐലാന്‍ഡര്‍ ഫണ്ടില്‍ നിന്ന് ഐനാനിക്ക്  പതിനാറായിരത്തി എണ്ണൂറു   ഡോളര്‍ ഗ്രാന്റ് ആയി ലഭിച്ചിരുന്നു.  കൊയാലിഷന്‍  ഓഫ് ഏഷ്യന്‍ ഫാമിലീസ് ആന്‍ഡ് ചില്‍ഡ്രന്‍ എന്ന സംഘടനയുമായി ഏഷ്യന്‍ കമ്മ്യൂണിറ്റി അനുഭവിച്ചുകൊണ്ടിരിക്കുന്ന ഏഷ്യന്‍-വിരുദ്ധ സംഭവങ്ങളെ നേരിടുന്നതിനുള്ള ശ്രമമായിരുന്നു ഡോ. അന്നാ ജോര്‍ജ്, ഡോ. സോളിമോള്‍ കുരുവിള, ഡോ. ഷൈലാ റോഷിന്‍ എന്നിവര്‍ ചേര്‍ന്ന് നടത്തിയ ബൈസ്റ്റാന്‍ഡര്‍ (5-D ) ഇന്റര്‍വെന്‍ഷന്‍ എന്ന വിദ്യാഭ്യാസ-പരിശീലന പ്രോഗ്രാം. ദൈനം ദിന ജീവിതത്തില്‍ പല തുറകളിലും പല രൂപങ്ങളില്‍ നിറത്തിന്റെ പേരിലും വര്‍ഗ്ഗത്തിന്റെ പേരിലും നമ്മള്‍ അനുഭവിക്കുകയോ ദൃക്‌സാക്ഷിയാകുകയോ ചെയ്യുന്ന ഭീഷണികള്‍,  പക്ഷാഭേദം,   വിവേചനം, വാക്കുകള്‍ കൊണ്ടുള്ള പീഢനം, നശീകരണങ്ങള്‍, തുടങ്ങിയ സംഭവങ്ങളെ ഒഴിവാക്കുന്നതിനോ സംഭവങ്ങളുടെ ഇരയെ സഹായിക്കുന്നതിനോ എങ്ങനെ സാധിക്കും എന്നതായിരുന്നു ലക്ഷ്യം. ഒരു കാഴ്ചക്കാരന്‍ അല്ലെങ്കില്‍ കാഴ്ചക്കാരി എന്ന നിലയില്‍ സ്വന്തം സുരക്ഷിതത്വത്തിനു ഭംഗം വരാതെ എങ്ങനെ ഇടപെടാം എന്ന് ഈ പരിശീലന പ്രോഗ്രാമിലൂടെ അവതാരികകള്‍ വിവരിച്ചു. 

പ്രൊഫെഷണല്‍ ഡെവലപ്പ്‌മെന്റ് കമ്മിറ്റി ചെയര്‍ ആദ്യാന്തം മോഡറേറ്റ് ചെയ്തു.  അമേരിക്കന്‍ നഴ്‌സിംഗ് ക്രെഡന്‍ഷ്യലിങ് സെന്റര്‍ അംഗീകരിച്ച വിലപ്പെട്ട നാലു കണ്ടിന്യൂയിങ് എജുക്കേഷന്‍ മണിക്കൂറുകളും പ്രഭാത ഭക്ഷണവും ലഞ്ചും ഉച്ചയ്ക്കുശേഷമുള്ള കോഫിയും സ്‌നാക്കുകളുമടങ്ങിയ ദിനം പങ്കെടുത്തവര്‍ക്ക് പൂര്‍ണ്ണമായും സൗജന്യമായാണ് ഐനാനി ഈ സെമിനാര്‍ സംഘടിപ്പിച്ചത്. പ്രോഗ്രാമിന് സ്പോണ്‍സര്‍ഷിപ് നല്‍കി സഹായിച്ച അഗാപ്പെ ട്രിനിറ്റി ഇന്‍ഷുറന്‍സിന്റെ റോഷന്‍ തോമസിന് ആനി സാബു നന്ദി പറഞ്ഞു.  ആന്റോ പോള്‍ ഐനിങ്കല്‍, ഡോ. അന്നാ ജോര്‍ജ്, ഡോ. ഷൈല റോഷിന്‍, ഉഷാ ജോര്‍ജ്, ഗ്രേസ് അലക്സാണ്ടര്‍, ഐനിങ്കല്‍, റോഷന്‍ മാമ്മന്‍, ഡോ. ജയാ തോമസ് തുടങ്ങി ഐനാനിയുടെ നേതൃ സമിതി സെമിനാറിന്റെ വിജയത്തിനായി ആനി സാബുവിനോടൊപ്പം സജീവമായി പ്രവര്‍ത്തിച്ചു.