വഖഫ് ബില്ലിനെച്ചൊല്ലിയുള്ള തർക്കത്തിനിടയിൽ , രാജ്യത്തെ ഏറ്റവും വലിയ ഭൂവുടമ കത്തോലിക്കാ സഭയാണെന്ന് അവകാശപ്പെടുന്ന ആർ‌എസ്‌എസിന്റെ മുഖപത്രത്തിൽ വന്ന  ലേഖനത്തിനെതിരെ രാഹുൽ ഗാന്ധി. ക്രിസ്ത്യൻ സമൂഹമായിരിക്കും ആർ‌എസ്‌എസിന്റെ അടുത്ത ലക്ഷ്യം എന്ന് കോൺഗ്രസ് എംപി രാഹുൽ ഗാന്ധി മുന്നറിയിപ്പ് നൽകി.

ഇന്ത്യയിലെ കത്തോലിക്കാ സ്ഥാപനങ്ങൾ 7 കോടി ഹെക്ടർ ഭൂമി കൈവശം വച്ചിട്ടുണ്ടെന്നും, അത് അവരെ ഏറ്റവും വലിയ സർക്കാരിതര ഭൂവുടമകളാക്കി മാറ്റുന്നുവെന്നും അവകാശപ്പെട്ടുകൊണ്ടാണ് ഓർഗനൈസറിൻ്റെ വെബ്‌സൈറ്റിൽ ലേഖനം പ്രസിദ്ധീകരിച്ചത്, ഇത് പിന്നീട് നീക്കം ചെയ്തു.

"വഖഫ് ബിൽ ഇപ്പോൾ മുസ്ലീങ്ങളെ ആക്രമിക്കുന്നുണ്ടെങ്കിലും ഭാവിയിൽ മറ്റ് സമുദായങ്ങളെ ലക്ഷ്യം വയ്ക്കുന്നതിനുള്ള ഒരു മാതൃക സൃഷ്ടിക്കുന്നുവെന്ന് ഞാൻ പറഞ്ഞിരുന്നു. ആർ‌എസ്‌എസ് ക്രിസ്ത്യാനികളിലേക്ക് ശ്രദ്ധ തിരിക്കാൻ അധികനാളെടുത്തില്ല. അത്തരം ആക്രമണങ്ങളിൽ നിന്ന് നമ്മുടെ ജനങ്ങളെ സംരക്ഷിക്കുന്ന ഒരേയൊരു കവചം ഭരണഘടനയാണ് - അതിനെ പ്രതിരോധിക്കേണ്ടത് നമ്മുടെ കൂട്ടായ കടമയാണ്," ഓർഗനൈസറിന്റെ ലേഖനത്തെ അടിസ്ഥാനമാക്കിയുള്ള വാർത്താ റിപ്പോർട്ടിന്റെ ലിങ്ക് പങ്കിട്ട് ഗാന്ധി ട്വീറ്റ് ചെയ്തു.