ഒട്ടാവ: കാനഡയില്‍ കഴിഞ്ഞ ദിവസം കുത്തേറ്റ് മരിച്ചത് ഗുജറാത്ത് സ്വദേശി ധര്‍മേഷ് കതിരിയ ആണെന്ന് പോലീസ്. ഒട്ടാവയ്ക്കടുത്തുള്ള ടൗണ്‍ഷിപ്പില്‍ വെച്ച് കഴിഞ്ഞ  വെള്ളിയാഴ്ചയാണ് ഗുജറാത്തിലെ ഭാവ്നഗര്‍ ജില്ലയില്‍ നിന്നുള്ള 27 വയസ്സുകാരനായ ധര്‍മേഷ് കതിരിയ കൊല്ലപ്പെട്ടത്.

ഒന്റാറിയോയിലെ റോക്ക്ലാന്‍ഡില്‍ ഭാര്യയ്ക്കൊപ്പം താമസിച്ചിരുന്ന ധര്‍മേഷ് കതിരിയ കെട്ടിടത്തിലെ പൊതുവായ അലക്കു മുറിയില്‍ നിന്ന് പുറത്തുവരുമ്പോള്‍ അയല്‍ക്കാരന്‍ കുത്തുകയായിരുന്നുവെന്നാണ് റിപ്പോര്‍ട്ടുകള്‍. 60 വയസ്സ് തോന്നിക്കുന്ന ഒരു വെള്ളക്കാരനാണ് അക്രമം നടത്തിയതെന്നാണ് സൂചന. കഴിഞ്ഞ വര്‍ഷമാണ് കതിരിയയുടെ ഭാര്യ കാനഡയില്‍ എത്തിയത്. സംഭവം നടക്കുമ്പോള്‍ ഭാര്യയുടെ നിലവിളി കേട്ടതായും ദൃക്സാക്ഷികള്‍ പറഞ്ഞു.

2019ല്‍ രാജ്യാന്തര വിദ്യാര്‍ഥിയായി കാനഡയിലെത്തിയ കതിരിയ വര്‍ക്ക് പെര്‍മിറ്റില്‍ ജോലി ചെയ്യുകയായിരുന്നു. കതിരിയ മാനേജരായി ജോലി ചെയ്തിരുന്ന റോക്ക്ലാന്‍ഡിലെ മിലാനോ പിസ്സയ്ക്ക് സംഭവത്തെ തുടര്‍ന്ന് ഉടമസ്ഥര്‍ അവധി നല്‍കി.

സംഭവത്തില്‍ ഒരു പ്രതിയെ പൊലീസ് കസ്റ്റഡിയിലെടുത്തിട്ടുണ്ടെന്നും ദുഃഖിതരായ കുടുംബത്തിന് സാധ്യമായ എല്ലാ സഹായവും നല്‍കുന്നതിന്  പ്രാദേശിക കൂട്ടായ്മയുമായി ബന്ധപ്പെടുന്നുണ്ടെന്നും ഒട്ടാവയിലെ ഇന്ത്യന്‍ ഹൈക്കമ്മീഷന്‍ അറിയിച്ചു.