വാഷിംഗ്ടൺ ഡി.സി: റിപ്പബ്ലിക്കൻ പാർട്ടി സേഫ്ഗാർഡ് അമേരിക്കൻ വോട്ടർ എലിജിബിലിറ്റി (സേവ്) ആക്റ്റ് കോൺഗ്രസിൽ പാസാക്കിയതിനെതിരെ  കോൺഗ്രസ് ഏഷ്യൻ പസഫിക് അമേരിക്കൻ കോക്കസ് (CAPAC) രംഗത്തു വന്നു.

"ഹൗസ് റിപ്പബ്ലിക്കൻമാരുടെ സേവ് ആക്റ്റ് ദശലക്ഷക്കണക്കിന് അമേരിക്കക്കാരുടെ ശബ്ദം ഇല്ലാതാക്കാനുള്ള ലജ്ജാകരമായ ശ്രമം മാത്രമാണ്. വോട്ട് ചെയ്യാൻ രജിസ്റ്റർ ചെയ്യുന്നതിന് ഡ്രൈവിംഗ് ലൈസൻസോ സൈനിക തിരിച്ചറിയൽ കാർഡോ ഉപയോഗിക്കുന്നതിൽ നിന്ന് ഈ ബിൽ അമേരിക്കക്കാരെ തടയും. മെയിൽ അല്ലെങ്കിൽ ഓൺലൈൻ വഴി രജിസ്റ്റർ ചെയ്യുന്നത് ഉൾപ്പെടെയുള്ള നിലവിലുള്ള വോട്ടർ രജിസ്ട്രേഷൻ രീതികളും ഇത് ഇല്ലാതാക്കും,' കോക്കസിന്റെ  ചെയർപേഴ്സൺ കോൺഗ്രസംഗം  ഗ്രേസ് മെങ്ങും CAPAC സിവിൽ ആൻഡ് വോട്ടിംഗ് അവകാശ ടാസ്ക് ഫോഴ്സ് ചെയർപേഴ്സൺ റോബർട്ട് സി. "ബോബി" സ്കോട്ടും സംയുക്ത പ്രസ്താവനയിൽ ചൂണ്ടിക്കാട്ടി.

"ഈ ബിൽ നിയമമാവുകയാണെങ്കിൽ, വിദേശത്ത് നിയോഗിക്കപ്പെട്ട സൈനികർക്ക്   വോട്ടറായി    രജിസ്റ്റർ ചെയ്യുന്നതിന് അമേരിക്കയിലേക്ക് വരണം. പേര് മാറ്റിയ വിവാഹിതരായ സ്ത്രീകൾക്ക് പൗരത്വം തെളിയിക്കാൻ ജനന സർട്ടിഫിക്കറ്റ് ഉപയോഗിക്കാൻ കഴിയില്ല. വോട്ട് ചെയ്യാനുള്ള  രേഖകൾ നേടാൻ 21 ദശലക്ഷം യോഗ്യരായ വോട്ടർമാർ വലിയ ഫീസ് നൽകേണ്ടിവരും.

'വോട്ട് ചെയ്യുന്നതിന് അനാവശ്യവും ചെലവേറിയതുമായ തടസ്സങ്ങൾ സൃഷ്ടിക്കുന്നത്  ദശലക്ഷക്കണക്കിന് യു.എസ് പൗരന്മാരുടെ അവകാശങ്ങൾ ഇല്ലാതാക്കുകയും ഏഷ്യൻ അമേരിക്കൻ, നേറ്റീവ് ഹവായിയൻ, പസഫിക് ഐലൻഡർ (AANHPI) സമൂഹത്തെ അസന്തുലിതമായി ബാധിക്കുകയും ചെയ്യും.  

കൂടാതെ, പ്രസിഡന്റ് ട്രംപ് പരിമിതമായ ഇംഗ്ലീഷ് പ്രാവീണ്യമുള്ള വ്യക്തികൾക്കുള്ള ഭാഷാ ലഭ്യത കുറയ്ക്കുന്നു - ഇങ്ങനെയുള്ളവർ  AANHPI സമൂഹത്തിന്റെ മൂന്നിലൊന്ന് വരും.

ജനന സർട്ടിഫിക്കറ്റ് ഉപയോഗിച്ച് വോട്ട് ചെയ്യാൻ രജിസ്റ്റർ ചെയ്യുന്നതിൽ നിന്ന് അമേരിക്കക്കാരെ തടയുന്ന ഒരു എക്സിക്യൂട്ടീവ് ഓർഡറിലും ട്രംപ്  ഒപ്പുവച്ചു - ഇത് ജന്മാവകാശ  പൗരത്വം റദ്ദാക്കുന്ന അദ്ദേഹത്തിന്റെ നിയമവിരുദ്ധ ഉത്തരവിനെ സൂചിപ്പിക്കുന്നു.  

പൗരന്മാരല്ലാത്തവർ  വോട്ട് ചെയ്യുന്നത് ഫെഡറൽ നിയമപ്രകാരം  കുറ്റകരമാണ്.  ഈ നിയമനിർമ്മാണം തിരഞ്ഞെടുപ്പുകളെ സംരക്ഷിക്കുന്നതിനല്ല. ദശലക്ഷക്കണക്കിന് അമേരിക്കക്കാരുടെ ഭരണഘടനാപരമായ അവകാശങ്ങളിലേക്കുള്ള നഗ്നമായ കടന്നുകയറ്റമാണിത്.  

English summery:

Criticism from Congressional Asian Pacific American Caucus leaders; Republican voting law condemned.