മരണമാസ്സ് സിനിമയിൽ സുരേഷ് കൃഷ്ണ അവതരിപ്പിച്ച ജിക്കുവിൻ്റെ പ്രതിശ്രുതവധുവിൻ്റെ ശബ്ദവും പാസ്‌പോർട്ട് സൈസ് ഫോട്ടോയും സ്ക്രീനിൽ പ്രത്യക്ഷപ്പെട്ടപ്പോൾ തിയേറ്ററിൽ വലിയ ചിരി ഉയർന്നു. അടുത്ത കുറച്ച് നാളുകളായി സോഷ്യൽ മീഡിയയിൽ വൈറലായ നാഗസൈരന്ത്രി ദേവി എന്ന വ്യക്തിയാണ് സിനിമയിൽ ശബ്ദമായി എത്തിയത്.

ഇവരെ സിനിമയിലേക്ക് കൊണ്ടുവന്നതിനെക്കുറിച്ച് സംവിധായകൻ ശിവപ്രസാദും നടനും തിരക്കഥാകൃത്തുമായ സിജു സണ്ണിയും  ഒരു അഭിമുഖത്തിൽ വിശദീകരിച്ചു. നാഗസൈരന്ത്രി ദേവിയുടെ ഫോൺ നമ്പർ ലഭ്യമല്ലാത്തതിനാൽ അവരെ ബന്ധപ്പെടാൻ ഏറെ ബുദ്ധിമുട്ടിയെന്ന് ഇരുവരും പറഞ്ഞു. അവരുടെ വീഡിയോകൾ സ്ഥിരമായി കാണാറുണ്ടായിരുന്നെന്നും, അങ്ങനെയാണ് സിനിമയിലേക്ക് പരിഗണിക്കുന്നതെന്നും സിജു സണ്ണി വ്യക്തമാക്കി. പ്രൊഡക്ഷൻ ടീമിനും ഈ ആശയം ഇഷ്ടപ്പെട്ടെങ്കിലും അവരെ കണ്ടെത്തുകയായിരുന്നു പ്രധാന വെല്ലുവിളി.

പല ആളുകൾ വഴിയാണ് നമ്പർ സംഘടിപ്പിച്ച് കൂടിക്കാഴ്ചയ്ക്ക് സമയം വാങ്ങിയത്. വീട്ടിൽ വെച്ച് തന്നെ റോളിനെക്കുറിച്ച് സംസാരിക്കുകയും ഡയലോഗ് റെക്കോർഡ് ചെയ്യുകയും ചെയ്തു. ജിക്കുവിൻ്റെ വധുവിനെ സ്ക്രീനിൽ കാണിക്കാൻ ആദ്യം പദ്ധതിയില്ലായിരുന്നെന്നും, സിനിമയിലുടനീളം അവരുടെ ശബ്ദം മാത്രമാണ് ഉദ്ദേശിച്ചിരുന്നതെന്നും സിജു കൂട്ടിച്ചേർത്തു. സിനിമ റിലീസിന് ശേഷം നാഗസൈരന്ത്രി ദേവിയെ ബന്ധപ്പെടാൻ കഴിഞ്ഞിട്ടില്ലെന്നും, സിനിമ കണ്ടതിന് ശേഷമുള്ള അവരുടെ അഭിപ്രായം അറിയാൻ ആകാംക്ഷയുണ്ടെന്നും സംവിധായകൻ ശിവപ്രസാദ് പറഞ്ഞു.