ഹിന്ദി സിനിമയില്‍ നിന്ന് സമീപകാലത്ത് സംഭവിച്ച ഒരു വലിയ വിജയം വിക്കി കൗശല്‍ ചിത്രം ഛാവ ആയിരുന്നു. മറാഠ ചക്രവര്‍ത്തി ആയിരുന്ന സംഭാജി മഹാരാജിന്‍റെ ജീവിതത്തെ ആസ്പദമാക്കുന്ന ചിത്രം സംവിധാനം ചെയ്തത് ലക്ഷ്മണ്‍ ഉടേക്കര്‍ ആണ്.

മഡ്ഡോക്ക് ഫിലിംസിന്‍റെ ബാനറില്‍ ദിനേഷ് വിജന്‍ ആണ് ചിത്രം നിര്‍മ്മിച്ചിരിക്കുന്നത്. രഷ്മിക മന്ദാന നായികയായ ചിത്രത്തില്‍ അക്ഷയ് ഖന്ന, ഡയാന പെന്‍റി, നീല്‍ ഭൂപാളം, അശുതോഷ് റാണ, ദിവ്യ ദത്ത തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്.

ഫെബ്രുവരി 14 വാലന്‍റൈന്‍സ് ദിനത്തിലാണ് ചിത്രം തിയേറ്ററുകളില്‍ എത്തിയത്. ഇപ്പോഴിതാ ഒടിടി റിലീസിന് ശേഷവും മറ്റൊരു ബോക്സ് ഓഫീസ് നേട്ടം സ്വന്തമാക്കിയിരിക്കുകയാണ് ചിത്രം. ഏപ്രില്‍ 11 ന് നെറ്റ്ഫ്ലിക്സിലൂടെ ആയിരുന്നു ചിത്രത്തിന്‍റെ ഒടിടി റിലീസ്.

ചിത്രം ഒടിടിയില്‍ എത്തിയിട്ട് 11 ദിനങ്ങള്‍ പിന്നിട്ടിരിക്കുന്നു. ഇന്ത്യന്‍ കളക്ഷനില്‍ (നെറ്റ്) 600 കോടി പിന്നിട്ടിരിക്കുകയാണ് ചിത്രം. ഒടിടി റിലീസ് കഴിഞ്ഞ് ഒരാഴ്ചയ്ക്ക് ശേഷമാണ് ഈ നേട്ടം എന്നത് ശ്രദ്ധേയമാണ്. ഇന്ത്യയില്‍ നിന്ന് 600 കോടി നെറ്റ് കളക്ഷന്‍ നേടുന്ന മൂന്നാമത്തെ ചിത്രമാണ് ഛാവ. പുഷ്പ 2 (ഹിന്ദി), സ്ത്രീ 2 എന്നിവയാണ് മുന്‍പ് ഈ നേട്ടം സ്വന്തമാക്കിയ ചിത്രങ്ങള്‍.