പാക്കിസ്ഥാൻ പൗരന്മാർക്കുള്ള നിലവിലുള്ള എല്ലാ വിസകളും ഇന്ത്യ റദ്ദാക്കി  ഒരു ദിവസത്തിന് ശേഷം, പാക്  പൗരന്മാരെ അതത് സംസ്ഥാനങ്ങളിൽ നിന്ന് ഉടൻ കണ്ടെത്തി തിരിച്ചയക്കാൻ കേന്ദ്ര ആഭ്യന്തര മന്ത്രി അമിത് ഷാ എല്ലാ മുഖ്യമന്ത്രിമാരോടും നിർദ്ദേശിച്ചു.

ഉന്നത ഉദ്യോഗസ്ഥരുമായി നടത്തിയ ഉന്നതതല യോഗത്തിന് ശേഷം, അവരെ നാടുകടത്താൻ അടിയന്തര നടപടികൾ സ്വീകരിക്കാൻ അമിത് ഷാ എല്ലാ സംസ്ഥാനങ്ങളിലെയും മുഖ്യമന്ത്രിമാർക്ക് നിർദ്ദേശം നൽകി. 

പഹൽഗാം ഭീകരാക്രമണത്തിന്റെ പശ്ചാത്തലത്തിൽ, എല്ലാ പാക്കിസ്ഥാൻ പൗരന്മാരോടും ഏപ്രിൽ 27 നകം ഇന്ത്യ വിടാൻ ഇന്ത്യ ആവശ്യപ്പെട്ടു. മെഡിക്കൽ വിസയുള്ള പാക്കിസ്ഥാൻ പൗരന്മാർക്ക് രണ്ട് ദിവസം കൂടി അധിക സമയം ലഭിക്കുമെങ്കിലും ഏപ്രിൽ 29 നകം രാജ്യം വിടേണ്ടിവരുമെന്ന് കേന്ദ്രം വ്യക്തമാക്കി.

 "പഹൽഗാം ഭീകരാക്രമണത്തിന്റെ പശ്ചാത്തലത്തിൽ സുരക്ഷാ കാര്യങ്ങൾക്കായുള്ള കാബിനറ്റ് കമ്മിറ്റി എടുത്ത തീരുമാനങ്ങളുടെ തുടർച്ചയായി, പാക്കിസ്ഥാൻ പൗരന്മാർക്കുള്ള വിസ സേവനങ്ങൾ ഉടനടി നിർത്തിവയ്ക്കാൻ ഇന്ത്യൻ സർക്കാർ തീരുമാനിച്ചു," വിദേശകാര്യ മന്ത്രാലയം വ്യാഴാഴ്ച പ്രസ്താവനയിൽ പറഞ്ഞു. 

കൂടാതെ, പാക്കിസ്ഥാനിലേക്ക് യാത്ര ചെയ്യരുതെന്ന് ഇന്ത്യ തങ്ങളുടെ പൗരന്മാരോട് കർശനമായി നിർദേശിച്ചു.