പാകിസ്ഥാൻ കരസേനാ മേധാവി ജനറൽ സയ്യിദ് അസിം മുനീർ വീണ്ടും ദ്വിരാഷ്ട്ര സിദ്ധാന്തം ഉയർത്തി ഇന്ത്യക്കെതിരെ രൂക്ഷമായ വിദ്വേഷ പ്രസ്താവനകൾ നടത്തി. അബോട്ടാബാദിലെ പാകിസ്ഥാൻ മിലിട്ടറി അക്കാദമിയിൽ നടന്ന പാസിംഗ് ഔട്ട് പരേഡിൽ സംസാരിക്കവെയാണ് അദ്ദേഹം ഈ വിവാദ പ്രസ്താവന നടത്തിയത്.

മുസ്ലീങ്ങളും ഹിന്ദുക്കളും ഒന്നല്ലെന്നും, അവർ വ്യത്യസ്ത രാഷ്ട്രങ്ങളാണെന്നുമുള്ള അടിസ്ഥാന വിശ്വാസത്തിലാണ് ദ്വിരാഷ്ട്ര സിദ്ധാന്തം നിലകൊള്ളുന്നതെന്ന് മുനീർ പറഞ്ഞു. മതം, ആചാരങ്ങൾ, പാരമ്പര്യങ്ങൾ, ചിന്തകൾ, അഭിലാഷങ്ങൾ എന്നിവയിൽ മുസ്ലീങ്ങൾ ഹിന്ദുക്കളിൽ നിന്ന് വ്യത്യസ്തരാണെന്നും അദ്ദേഹം കൂട്ടിച്ചേർത്തു. പാകിസ്ഥാന്റെ നിലനിൽപ്പ് "അതുല്യമായ പോരാട്ടത്തിന്റെയും ത്യാഗങ്ങളുടെയും" ഫലമാണെന്നും അത് സംരക്ഷിക്കേണ്ടത് രാജ്യത്തെ സായുധ സേനയുടെ കടമയാണെന്നും അദ്ദേഹം പറഞ്ഞു.

പഹൽഗാം ആക്രമണത്തെ തുടർന്ന് ഇന്ത്യയുമായുള്ള സംഘർഷം വർദ്ധിക്കുന്നതിനിടെയാണ് മുനീറിന്റെ ഈ പ്രസ്താവന. കശ്മീർ വിഷയത്തിൽ "നിഷ്പക്ഷവും സുതാര്യവും വിശ്വസനീയവുമായ" അന്വേഷണത്തിന് തയ്യാറാണെന്ന് പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് നേരത്തെ പ്രഖ്യാപിച്ചിരുന്നു. എന്നാൽ, മുനീറിന്റെ പ്രകോപനപരമായ പ്രസ്താവന ഇരു രാജ്യങ്ങളും തമ്മിലുള്ള ബന്ധം കൂടുതൽ വഷളാക്കുമെന്നാണ് വിലയിരുത്തൽ.

മുനീർ ഇത്തരത്തിൽ അസ്ഥാനത്തുള്ള സംസാരങ്ങളിൽ ഏർപ്പെടുന്നത് ഇതാദ്യമല്ല. പഹൽഗാം ആക്രമണത്തിന് ഏതാനും ദിവസങ്ങൾക്ക് മുമ്പ് ഇസ്ലാമാബാദിൽ നടന്ന ഒരു പരിപാടിയിൽ കശ്മീരിനെ പാകിസ്ഥാന്റെ "ജീവരക്തധമനി" എന്ന് അദ്ദേഹം വിശേഷിപ്പിച്ചിരുന്നു. പാകിസ്ഥാൻ നിയമവിരുദ്ധമായി കൈവശം വച്ചിരിക്കുന്ന പ്രദേശങ്ങൾ ഒഴിയണമെന്ന് ഇന്ത്യ ഇതിന് മറുപടിയും  നൽകി. മുനീറിന്റെ പ്രസ്താവനക്കെതിരെ ഇന്ത്യ ശക്തമായ വിമർശനം ഉന്നയിച്ചു. വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ, കശ്മീർ ഇന്ത്യയുടെ അവിഭാജ്യ ഘടകമാണെന്നും പാകിസ്ഥാൻ നിയമവിരുദ്ധമായി കൈവശം വച്ചിരിക്കുന്ന പ്രദേശങ്ങൾ ഒഴിയണമെന്നും വ്യക്തമാക്കി.

English summary:

Once again raising the two-nation theory, Pakistani army chief makes anti-India statement.