നാടു കടത്തിയ ആളെ തിരിച്ചു കൊണ്ടുവരണമെന്ന കോടതി ഉത്തരവിനു ഭരണകൂടം വഴങ്ങുന്നു (പിപിഎം)

മെക്സിക്കോയിലേക്കും പിന്നീട് ഗോട്ടിമാലയിലേക്കും നാടുകടത്തിയ ഗോട്ടിമാല സ്വദേശിയെ തിരിച്ചു കൊണ്ടുവരണമെന്ന കോടതി ഉത്തരവ് അനുസരിക്കുമെന്നു ജസ്റ്റിസ് ഡിപ്പാർട്മെന്റ് ബുധനാഴ്ച്ച കോടതിയെ അറിയിച്ചു. ആദ്യമായാണ് നിയമാനുസൃതമല്ലാതെ കയറ്റി അയച്ച ഒരാളെ തിരിച്ചു കൊണ്ടുവരണമെന്ന കോടതി ഉത്തരവ് ട്രംപ് ഭരണകൂടം അംഗീകരിക്കുന്നത്.

ഓ സി ജി എന്ന മൂന്നക്ഷരങ്ങളിൽ മാത്രം അറിയപ്പെടുന്ന വ്യക്തി നാടുകടത്തുന്നതിനു മുൻപ് മെക്സിക്കോയിൽ അനുഭവിച്ചിട്ടുള്ള അക്രമത്തെ ഭയക്കുന്നുവെന്നു യുഎസ് അധികൃതരെ അറിയിച്ചിരുന്നു. നിയമാനുസൃതമല്ല ആ നാടുകടത്തൽ എന്നു തെളിയിക്കാൻ ഓ സി ജിക്കു  കഴിയുമെന്നു ചൂണ്ടിക്കാട്ടി, അയാളെ തിരിച്ചു കൊണ്ടുവരാൻ മാസച്യുസെറ്റ്സിലെ ഫെഡറൽ ഡിസ്‌ട്രിക്‌ട് കോർട്ട് ജഡ്‌ജ്‌ ബ്രയാൻ ഇ. മര്ഫിയാണ് ഉത്തരവിട്ടത്.

ഓ സി ജിയുടെ അഭിഭാഷകരെ ബന്ധപ്പെട്ടുവെന്നും അയാളെ തിരിച്ചു കൊണ്ടുവരാൻ ഏർപ്പാട് ചെയ്യുമെന്നും ജസ്റ്റിസ് ഡിപ്പാർട്മെന്റ് ബുധനാഴ്ച്ച മർഫിയെ അറിയിച്ചു.

അതിവേഗത്തിൽ കൂട്ട നാടുകടത്തൽ നടപ്പാക്കാനുള്ള ട്രംപിന്റെ ശ്രമങ്ങളെ കോടതികൾ തടഞ്ഞു തുടങ്ങിയ ശേഷം കനത്തു വന്ന സംഘർഷത്തിനിടയിൽ ഇതാദ്യമായി ഭരണകൂടം വഴങ്ങുകയാണ്. തിരിച്ചു കൊണ്ടുവരണമെന്നു സുപ്രീം കോടതി പോലും പറഞ്ഞിട്ടും മെരിലാൻഡ് നിവാസി അബ്‌റീഗോ ഗാർഷ്യയെ എൽ സാൽവദോറിൽ നിന്നു കൊണ്ടുവരാൻ ഭരണകൂടം തയാറായിട്ടില്ല. സാങ്കേതിക തടസങ്ങൾ ഉന്നയിച്ചു അത് അസാധ്യമെന്നു വാദിക്കയാണ് അവർ ചെയ്യുന്നത്.

നാടുകടത്തലിനു കോടതികൾ സൃഷ്ടിക്കുന്ന തടസം നീക്കണം എന്നപേക്ഷിച്ചു ട്രംപ് ഭരണകൂടം സുപ്രീം കോടതിയെ സമീപിച്ചിട്ടുമുണ്ട്. ഇക്കാര്യത്തിൽ കൂടുതൽ അധികാരങ്ങൾ ലഭിക്കാൻ പൊരുതുമെന്നു ഹോംലാൻഡ് സെക്യൂരിറ്റി വക്താവ് ട്രിഷ്യ മക്ലഫ്‌ലിൻ പറഞ്ഞു.

ഓ സി ജിയെ തിരിച്ചു കൊണ്ടുവന്നാൽ അദ്ദേഹത്തിനു മുൻ പരിചയം ഇല്ലാത്ത ഏതെങ്കിലും രാജ്യത്തേക്ക് അയക്കുന്നത് പരിഗണിക്കുമെന്നും അവർ സൂചിപ്പിച്ചു.

2024ൽ മെക്സിക്കോ വഴി യുഎസിലേക്കു വരുമ്പോൾ ഓ സി ജിയെ കുറെപ്പേർ ചേർന്നു തട്ടിക്കൊണ്ടു പോയിരുന്നു. അയാളുടെ സഹോദരി പണം അയച്ചു കൊടുത്ത ശേഷമാണ് മോചിപ്പിച്ചത്.

അയാളെ മെക്സിക്കോയിലേക്കു അയക്കില്ലെന്നു ഇമിഗ്രെഷൻ കോടതി ഉറപ്പു നൽകിയിരുന്നു. എന്നാൽ ഭരണകൂടം അതു കാര്യമാക്കാതെ അയാളെ മെക്സിക്കോയിലേക്കു തന്നെ അയച്ചു. അവിടന്നു മെക്സിക്കൻ അധികൃതർ നൽകിയ പരിഗണയിലാണ് സ്വന്തം നാട്ടിലേക്കു പോയത്.

DoJ agrees to bring back Guatemalan