ഹോളിവുഡിലെയും ഇന്ത്യൻ സിനിമയിലെയും താരങ്ങളുടെ പ്രതിഫലത്തെക്കുറിച്ചുള്ള കണക്കുകൾ സിനിമാ വ്യവസായത്തിൽ നിലനിൽക്കുന്ന ചില വൈരുദ്ധ്യങ്ങളിലേക്ക് വിരൽചൂണ്ടുന്നു. വലിയ ബഡ്ജറ്റുകളിലുള്ള ഹോളിവുഡ് ചിത്രങ്ങളിൽ നായകനും നായികയ്ക്കും ലഭിക്കുന്നതിനേക്കാൾ വലിയ തുകകൾ ഇന്ത്യൻ താരങ്ങൾ, പ്രത്യേകിച്ച് ചില തമിഴ് നടന്മാർ, കൈപ്പറ്റുന്നുണ്ടെന്ന് പുതിയ റിപ്പോർട്ടുകൾ സൂചിപ്പിക്കുന്നു.

1900 കോടി രൂപ മുതൽമുടക്കുള്ള 'സൂപ്പർമാൻ' എന്ന ഹോളിവുഡ് ചിത്രത്തിൽ നായകനായ ഡേവിഡ് കൊറൻസ്‌വെറ്റിന് ലഭിച്ചത് കേവലം 6 കോടി രൂപ മാത്രമാണ്. നായികയായ റേച്ചൽ ബ്രോസ്‌നഹാനും സമാനമായ തുകയാണ് പ്രതിഫലമായി കൈപ്പറ്റിയത്. എന്നാൽ, ഈ ചിത്രത്തിലെ വില്ലനായ നിക്കൊളാസ് ഹൗൾട്ട് ആണ് ഏറ്റവുമധികം പ്രതിഫലം വാങ്ങിയത്; ലെക്സ് ലൂഥർ എന്ന കഥാപാത്രത്തിനായി അദ്ദേഹം 17 കോടിയോളം രൂപ നേടി.

ഹോളിവുഡ് താരങ്ങളെ പോലും അമ്പരപ്പിക്കുന്ന പ്രതിഫലമാണ് ചില തമിഴ് താരങ്ങൾ വാങ്ങുന്നതെന്നാണ് റിപ്പോർട്ടുകൾ. വിജയ് ഏറ്റവും ഒടുവിൽ പുറത്തിറങ്ങിയ സിനിമകൾക്ക് 250 കോടി രൂപയും, രജനികാന്ത് 150 കോടി രൂപയും കൈപ്പറ്റിയതായി പറയപ്പെടുന്നു. മലയാള സിനിമയിലേക്ക് വരുമ്പോൾ, യുവനിരയിലുള്ള ഒരു സൂപ്പർതാരം പോലും 7 കോടി രൂപയും ഓവർസീസ് റൈറ്റുകളും വാങ്ങുന്നുണ്ട്. ഇത് ഡേവിഡ് കൊറൻസ്‌വെറ്റിനേക്കാൾ ഒരു കോടി രൂപ കൂടുതലാണ്. കാര്യമായ ഇനീഷ്യൽ കളക്ഷൻ ഇല്ലാത്ത ഒരു സീനിയർ നടനും ഒരു ബമ്പർ ഹിറ്റിന്റെ മാത്രം പിൻബലമുള്ള യുവനടനും 10 കോടി വീതം ചോദിക്കുന്നുണ്ട്. ഇവരുടെ സിനിമകൾക്ക് മിനിമം ഗ്യാരണ്ടി പോലും നൽകാൻ പലപ്പോഴും നിർമ്മാതാക്കൾക്ക് കഴിയാറില്ല.

അടുത്തിടെ ഒരു മെഗാഹിറ്റ് നൽകിയ റൊമാന്റിക് ഹീറോ ഒറ്റയടിക്ക് 2 കോടി രൂപയായി പ്രതിഫലം വർദ്ധിപ്പിച്ചതിന് പുറമെ, താൻ പറയുന്നവരെ സിനിമയിൽ വയ്ക്കണമെന്നും തന്റെ ഇഷ്ടത്തിനനുസരിച്ച് തിരക്കഥ മാറ്റിയെഴുതണമെന്നും ശഠിക്കുന്നുണ്ടെന്നും റിപ്പോർട്ടുകളുണ്ട്. "മറ്റുള്ളവരുടെ പണത്തിൽ എന്തുമാകാം എന്ന ദാർഷ്ട്യമാണ് ഇത്തരം നിലപാടുകൾക്ക് പിന്നിൽ," സിനിമാ രംഗത്തുള്ളവർ അഭിപ്രായപ്പെടുന്നു. ഇതിനെത്തുടർന്ന്, ചില നിർമ്മാതാക്കൾ ആ നടനെ മാറ്റിനിർത്താൻ തീരുമാനിച്ചതായും സൂചനയുണ്ട്. നായകന്മാരിൽ നിന്ന് മാറി സ്വഭാവ നടന്മാരിലേക്ക് വന്നാലും സമാനമായ സാഹചര്യമാണ് നിലവിലുള്ളത്. ഈ പ്രവണത സിനിമാ വ്യവസായത്തിന് വലിയ ഭീഷണിയാണെന്നും വിലയിരുത്തപ്പെടുന്നു.

English summary:

Hollywood and Indian cinema; the shocking differences in star valuation.