(കീ വെസ്റ്റ് സന്ദർശിച്ചവർക്ക് ഇതൊരു ഓർമ്മ പുതുക്കലും, സന്ദർശിക്കാൻ ആഗ്രഹിക്കുന്നവർക്ക് ഇതൊരു ലളിതമായ പ്രചോദനാത്മകമായ കുറിപ്പുമായി കണക്കാക്കുക).

തെങ്ങും, മാവും, വാഴയും, ഈന്തപനകളും ഒരു പോലെ വളരുന്ന ഒരുവിചിത്ര നാട്. പൂവൻ കോഴിയും പിടകോഴിയും കുഞ്ഞുങ്ങളും കൂട്ടമായി വിഹരിക്കുന്ന തനി നാടൻ കേരളനാട് (പോലെ). പൂവൻ കോഴിയുടെ കൂകൽ കേട്ടുണരുന്ന നാട്. അതാണ് സൂര്യാസ്തമയങ്ങൾ ശ്രദ്ധ ആകർഷിക്കുന്ന അമേരിക്കൻ ഐക്യനാടുകളുടെ തെക്കേ അറ്റത്ത് സ്ഥിതി ചെയ്യുന്ന കീ വെസ്റ്റ് (Key West), ഭൂപടത്തിലെ ഒരു ബിന്ദുവിനേക്കാൾ ചെറുതായി തോന്നുന്ന കീ വെസ്റ്റ്.
ഓരോ തെരുവും കഥ പറയാൻ കാത്തിരിക്കുന്ന ഈ വിചിത്രമായ ദ്വീപിലേയ്ക്കുള്ള യാത്രയിൽ നിങ്ങൾക്കും പങ്കുചേരാം. 

42 പാലങ്ങളും 43 ദ്വീപുകളും കടന്ന് കീ വെസ്റ്റ് എന്നറിയപ്പെടുന്ന അവസാനത്തെ ദ്വീപിലേക്ക് എത്താൻ 113-mile ദൂരം റൂട്ട് 1 (Route 1) എന്ന ഹൈവേയിലൂടെ ഫ്ലോറിഡ mainland- ൽ നിന്നും യാത്ര ചെയ്യണം. ഈ ദൂരത്തിൻ്റെ ഭൂരിഭാഗവും ഒറ്റ-വരി റോഡുകൾ ഉൾപ്പെടുന്നതിനാൽ, യാത്രയ്ക്ക് പതിവിലും കൂടുതൽ സമയമെടുക്കുമെന്ന് പ്രതീക്ഷിക്കുക. 
ഈ 42 പാലങ്ങളിൽ ഒന്നാണ് ലോകത്തിലെ ഏറ്റവും നീളമുള്ള പാലങ്ങളിൽ ഒന്നായ സെവൻ മൈൽ ബ്രിഡ്ജ് (Seven Mile Bridge). മധ്യ കീസിനെയും ലോവർ കീസിനെയും ബന്ധിപ്പിക്കുന്ന കടലിലൂടെ നീണ്ടുപോകുന്ന ഈ പാലം ഒരു എഞ്ചിനീയറിംഗ് അത്ഭുതം തന്നെയാണ്.

1900-കളുടെ തുടക്കത്തിൽ "ഓവർസീസ് റെയിൽറോഡ്" പദ്ധതിയുടെ ഭാഗമായി നിർമ്മിച്ചതാണ് പഴയ സെവൻ മൈൽ ബ്രിഡ്ജ്. അക്കാലത്ത് "ലോകത്തിൻ്റെ എട്ടാമത്തെ അത്ഭുതം" എന്നാണ് ഇത് അറിയപ്പെട്ടിരുന്നത്, കാരണം മൈലുകളോളം കടലിലൂടെയുള്ള ഒരു റെയിൽപാത നിർമ്മിക്കുന്നത് ചിന്തിക്കാൻ പോലും കഴിയാത്തതായിരുന്നു. 1935-ലെ ഒരു ചുഴലിക്കാറ്റിൽ ഈ റെയിൽവേയ്ക്ക് വലിയ നാശനഷ്ടങ്ങൾ സംഭവിച്ചു. 
ഇന്ന് നമ്മൾ കാണുന്ന പുതിയ സെവൻ മൈൽ ബ്രിഡ്ജ് 1982-ൽ നിർമ്മിച്ചതാണ്. ഇത് പഴയ പാലത്തിന് സമാന്തരമായിട്ടാണ് സ്ഥിതി ചെയ്യുന്നത്. പഴയ പാലത്തിൻ്റെ ഒരു ഭാഗം ഇപ്പോഴും നിലവിലുണ്ട്, ഇത് നടക്കാനും സൈക്കിൾ ഓടിക്കാനും മീൻ പിടിക്കാനും ഉപയോഗിക്കുന്നു. ഈ പാലത്തിലൂടെയുള്ള യാത്ര അറ്റ്ലാന്റിക് സമുദ്രത്തിൻ്റെയും മെക്സിക്കൻ ഉൾക്കടലിൻ്റെയും മനോഹരമായ കാഴ്ചകൾ സമ്മാനിക്കുന്നു, ഇത് ഫ്ലോറിഡ കീസിലേക്കുള്ള റോഡ് യാത്രയിലെ ഒരു പ്രധാന ആകർഷണമാണ്.

ഫ്ലോറിഡയിലെ കീ വെസ്റ്റ് മുതൽ മെയ്‌നിലെ ഫോർട്ട് കെന്റ് (Key West to Fort Kent, Maine) വരെ 13 സംസ്ഥാനങ്ങളിലായി 2,390 മൈൽ (3846 KM) വ്യാപിച്ചുകിടക്കുന്ന ഒരു പ്രധാന തെക്ക്-വടക്ക് ഹൈവേയാണ് യുഎസ് റൂട്ട് 1. 1938-ൽ പണിതിർന്ന ഈ ഹൈവേ വൈവിധ്യമാർന്ന ഭൂപ്രകൃതികളെയും സംസ്കാരങ്ങളെയും ബന്ധിപ്പിക്കുന്ന, കിഴക്കൻ തീരത്തുടനീളമുള്ള യാത്രക്കാർക്കും വാണിജ്യത്തിനും ഒരു സുപ്രധാന കണ്ണിയായി പ്രവർത്തിച്ചു.

ഫ്ലോറിഡ കീസിൽ നിങ്ങൾ കാണുന്ന ചെറിയ മാനുകളെ കീ ഡീർ (Key Deer) എന്ന് വിളിക്കുന്നു. വടക്കേ അമേരിക്കൻ മാനുകളിൽ വെച്ച് ഏറ്റവും ചെറുതും, വംശനാശഭീഷണി നേരിടുന്ന ഇവ വലിയ കണ്ണുകളും, ചെറിയ ശരീരഘടനയും,  മനുഷ്യഭയം ഇല്ലാത്തവയുമാണ്. കീ വെസ്റ്റ്ൽ എത്തുന്നതിന് മുൻപുള്ള Big Pine Key എന്ന Island-ൽ ആണ് ഇവയെ കാണുന്നത്. സന്ദർശകർ പലപ്പോഴും കാണാൻ ആഗ്രഹിക്കുന്ന ഈ കീ മാനിനെ കാണാൻ എനിയ്ക്കും ഭാഗ്യം ലഭിച്ചു. കാരണം സൂര്യാസ്തമയ സമയത്താണ്  ഈ ദ്വീപിലൂടെ ഞങ്ങൾ കടന്നുപോയത്. ഈ മാനുകൾ അമേരിക്കയിലെ ഈ ദ്വീപിൽ മാത്രം കാണപ്പെടുന്നവയാണ്. 

1822 ജനുവരിയിൽ ഒരു യുഎസ് വ്യവസായി ജോൺ സൈമണ്ട്, 2,000 ഡോളറിന് തുല്യമായ തുകയ്ക്ക് സ്പാനിഷ്  ഗവർണറിൽ നിന്നും സ്വന്തമാക്കിയ കീ വെസ്റ്റ്, 1822 മാർച്ച് 25-ന്, യുണൈറ്റഡ് സ്റ്റേറ്റ്സിൻ്റെ യഥാർത്ഥ സ്വത്തായി മാറി.  പിന്നിട് ഇതിനെ അക്കാലത്ത് യുഎസ് നാവികസേന സെക്രട്ടറിയായിരുന്ന സ്മിത്ത് തോംസണിൻ്റെ ബഹുമാനാർത്ഥം കീ വെസ്റ്റ് എന്ന് പുനർനാമകരണം ചെയ്യുകയായിരുന്നു. 

കീ വെസ്റ്റ് യുണൈറ്റഡ് സ്റ്റേറ്റ്സിൻ്റെ ഏറ്റവും തെക്കേ അറ്റത്തുള്ള പോയിന്റുകളിലൊന്നാണ്, ഇവിടെ നിന്ന് ക്യൂബ (Cuba) ഏകദേശം 90 മൈൽ (145 കിലോമീറ്റർ) അകലെയാണു. ചരിത്രപരമായ കെട്ടിടങ്ങൾ, മനോഹരമായ കടൽത്തീരങ്ങൾ, എന്നിവയാൽ സതേൺമോസ്റ്റ് പോയിന്റ് (Southernmost Point) ലോകമെമ്പാടുമുള്ള സഞ്ചാരികളെ ആകർഷിക്കുന്നു. 
1900 ലെ ക്രിസ്മസ് ദിനത്തിൽ കീ വെസ്റ്റിൽ നിന്നാണ് ആദ്യത്തെ അന്താരാഷ്ട്ര ഫോൺ കോൾ നടത്തിയത്. അതും ക്യൂബയിലോട്ട്. അത് സാക്ഷ്യപെടുത്തുന്ന ഫലകമാണ് ചിത്രത്തിൽ കാണുന്നത്.

വർഷം മുഴുവൻ ഉഷ്ണമേഖലാ കാലാവസ്ഥ ആസ്വദിക്കുന്ന ഒരിടമാണ് കീ വെസ്റ്റ്. തെളിഞ്ഞ വെള്ളവും മിതമായ താപനിലയും കാരണം ജല കായിക വിനോദങ്ങൾക്ക് ഇത് ഏറ്റവും അനുയോജ്യമാണ്. യഥാർത്ഥത്തിൽ, ഇവിടെയുള്ള ഏറ്റവും പ്രശസ്തമായ വിനോദങ്ങളിൽ ഒന്നാണ് ജല കായിക വിനോദങ്ങൾ. സ്നോർക്കെലിംഗിനും സ്കൂബ ഡൈവിംഗിനും  ജെറ്റ് സ്കീയ്ക്കും  പേരുകേട്ട സ്ഥലമാണിത്. ലോകത്തിലെ മൂന്നാമത്തെ വലിയ പവിഴപ്പുറ്റായ ഫ്ലോറിഡ റീഫ്, വർണ്ണാഭമായ കടൽ ജീവികളുടെയും പവിഴങ്ങളുടെയും ആവാസ കേന്ദ്രമാണ്. ടർട്ടിൽ മ്യൂസിയം (Turtle Museum), ഷിപ്പ്‌റെക്ക് ട്രെഷർ മ്യൂസിയം (Shipwreck Treasure Museum) എന്നിവയുൾപ്പെടെ നിരവധി സ്ഥലങ്ങൾ ഇവിടുത്തെ സന്ദർശകരെ ആകർഷിക്കുന്നു.

ഫ്ലോറിഡയുടെ പ്രധാന കര പിന്നിട്ടാൽ, ചൂണ്ടയിട്ട് മീൻ പിടിക്കുന്ന ധാരാളം ആളുകളെ നിങ്ങൾക്ക് കാണാം. കീ വെസ്റ്റിൽ ഇത്തരത്തിൽ മീൻ പിടിക്കുന്നവർ നിരവധിയുണ്ട്. ഫിഷിംഗ് താൽപ്പര്യമുള്ളവർക്ക് ഡീപ് സീ ഫിഷിംഗ് ട്രിപ്പുകൾക്ക് പോകാവുന്നതാണ്. കയാക്കിംഗ് അല്ലെങ്കിൽ പാഡിൽബോർഡിംഗ് വഴി കണ്ടൽക്കാടുകളിലൂടെയുള്ള യാത്രയും മനോഹരമായ അനുഭവമാണ്. ഇതുകൂടാതെ, പലതരം ബോട്ട് ടൂറുകൾ, സൺസെറ്റ് ക്രൂയിസുകൾ, ഡോൾഫിൻ വാച്ചിംഗ് ടൂറുകൾ എന്നിവയും ഇവിടെ ലഭ്യമാണ്.

വിഭിന്ന സംസ്കാരങ്ങളുടെ സംഗമഭൂമിയാണ് ഇവിടം. കരീബിയൻ, ക്യൂബൻ, അമേരിക്കൻ സ്വാധീനങ്ങൾ ഇവിടുത്തെ പാചകരീതിയിലും സംഗീതത്തിലും കലകളിലും പ്രതിഫലിക്കുന്നു. ഉച്ചഭക്ഷണ സമയത്തും അത്താഴ സമയത്തും മിക്ക റെസ്റ്റോറന്റുകളിൽ നിന്നും നിങ്ങൾക്ക് അത്തരം സംഗീതം കേൾക്കാൻ സാധിക്കും. "കോഞ്ചസ്" (Conchs) എന്നാണ് ഇവിടുത്തെ സ്ഥിരതാമസക്കാർ അറിയപ്പെടുന്നത്.

ഏണസ്റ്റ് ഹെമിംഗ്‌വേ ഹോം ആൻഡ് മ്യൂസിയം സന്ദർശിക്കുന്നത് പ്രശസ്ത എഴുത്തുകാരൻ്റെ ജീവിതം അടുത്തറിയാൻ സഹായിക്കും. എല്ലാ ദിവസവും സൂര്യാസ്തമയ സമയത്ത് മാലറി സ്ക്വയറിൽ (Mallory Square) നടക്കുന്ന സൺസെറ്റ് സെലിബ്രേഷൻ (Sunset celebration) ഒരു നിർബന്ധമായും കണ്ടിരിക്കേണ്ട ഒന്നാണ്. ഓരോ വൈകുന്നേരവും സൂര്യാസ്തമയ ചടങ്ങുകൾക്കായി ആളുകൾ ഇവിടെ ഒത്തുകൂടുന്നു. ഇവിടെ കലാകാരന്മാരുടെയും തെരുവ് വിനോദക്കാരുടെയും പ്രകടനങ്ങൾ ആസ്വദിക്കാം. 

കീ വെസ്റ്റ് മ്യൂസിയം ഓഫ് ആർട്ട് ആൻഡ് ഹിസ്റ്ററി സ്ഥിതി ചെയ്യുന്ന കെട്ടിടം, "കസ്റ്റം ഹൗസ്" എന്നറിയപ്പെടുന്നു, ഇത് കീ വെസ്റ്റിലെ ഒരു ചരിത്രപ്രധാനമായ അടയാളമാണ്. 1891-ൽ നിർമ്മിച്ച ഈ ഗംഭീരമായ ചുവന്ന ഇഷ്ടിക കെട്ടിടം റിച്ചാർഡ്‌സൺ റൊമാനെസ്‌ക് വാസ്തുവിദ്യയുടെ മികച്ച ഉദാഹരണമാണ്.  ക്യൂബൻ മിസൈൽ പ്രതിസന്ധി സമയത്ത് യുഎസ് നാവികസേനയുടെ പ്രവർത്തനങ്ങളിൽ ഈ കെട്ടിടം ഒരു പ്രധാന പങ്ക് വഹിച്ചിട്ടുണ്ട്. 1991- മുതൽ പുനഃസ്ഥാപിക്കപ്പെടുകയും ഒരു ദേശീയ സ്മാരകവും അവാർഡ് നേടിയ മ്യൂസിയവുമായി തുറന്നുപ്രവർത്തിക്കുകയും ചെയ്യുന്നു.

Little White House: കീ വെസ്റ്റിലെ പ്രശസ്തമായ മറ്റൊരു ആകർഷണങ്ങളിലൊന്നാണ് ഹാരി എസ്. ട്രൂമാൻ ലിറ്റിൽ വൈറ്റ് ഹൗസ് (Harry S. Truman Little White House) മ്യൂസിയം. 1890-ൽ നാവികസേനയുടെ ഉദ്യോഗസ്ഥർക്കായി നിർമ്മിച്ച ഈ കെട്ടിടം, സ്പാനിഷ്-അമേരിക്കൻ യുദ്ധം, ഒന്നാം ലോകമഹായുദ്ധം, രണ്ടാം ലോകമഹായുദ്ധം എന്നിവയിൽ നാവിക കമാൻഡ് ആസ്ഥാനമായി പ്രവർത്തിച്ചിരുന്നു. എന്നാൽ, ഇതിന് ഏറ്റവും കൂടുതൽ പ്രാധാന്യം ലഭിച്ചത് 1946 മുതൽ 1952 വരെ പ്രസിഡന്റ് ഹാരി എസ്. ട്രൂമാൻ്റെ ശീതകാല വസതിയായി മാറിയപ്പോഴാണ്. തൻ്റെ പ്രസിഡൻസി കാലത്ത് ട്രൂമാൻ 11 തവണയായി 175 ദിവസത്തോളം ഇവിടെ താമസിച്ച് ജോലി ചെയ്തിട്ടുണ്ട്. യൂറോപ്പിൻ്റെ പുനർനിർമ്മാണം, ശീതയുദ്ധത്തിനുള്ള അമേരിക്കയുടെ പ്രതികരണം തുടങ്ങിയ പല നിർണായക തീരുമാനങ്ങൾക്കും ഈ വീട് സാക്ഷ്യം വഹിച്ചു. തോമസ് എഡിസൺ, വില്യം ഹോവാർഡ് ടാഫ്റ്റ്, ഡ്വൈറ്റ് ഐസൻഹോവർ, ജോൺ എഫ്. കെന്നഡി, ജിമ്മി കാർട്ടർ, ബിൽ ക്ലിന്റൺ തുടങ്ങിയ മറ്റ് പ്രമുഖ വ്യക്തികളും ഇവിടെ താമസിച്ചിട്ടുണ്ട്. ഇന്ന്, ഫ്ലോറിഡയിലെ ഏക പ്രസിഡൻഷ്യൽ മ്യൂസിയമായി ഇത് പ്രവർത്തിക്കുന്നു. ട്രൂമാൻ്റെ വ്യക്തിഗത വസ്തുക്കളും അക്കാലത്തെ ഒറിജിനൽ ഫർണിച്ചറുകളും ഇവിടെ സംരക്ഷിച്ചിരിക്കുന്നു. ഗൈഡഡ് ടൂറുകളിലൂടെ ഈ ചരിത്രപരമായ കെട്ടിടവും അതിൻ്റെ പ്രാധാന്യവും സന്ദർശകർക്ക് അടുത്തറിയാൻ സാധിക്കും.

കീ വെസ്റ്റിൽ ഗതാഗതം ഒരു പ്രശ്നമല്ല. ഇവിടെ ധാരാളം ബൈക്കുകൾ, സൈക്കിളുകൾ, ഗോൾഫ് കാർട്ടുകൾ എന്നിവ വാടകയ്ക്ക് നൽകുന്ന സ്ഥാപനങ്ങൾ കാണാം. കൂടാതെ, കീ വെസ്റ്റിന് ചുറ്റും ബസ് സർവീസുകൾ ലഭ്യമാണ്. വെറും 1 ഡോളറിന് എയർകണ്ടീഷൻ ചെയ്ത ബസ്സിൽ നിന്ന് ഇറങ്ങാതെ തന്നെ എത്ര റൗണ്ടും യാത്ര ചെയ്യാം. പണം ലാഭിക്കാനുള്ള പാസുകളും ഇതിൽ ലഭ്യമാണ്. നഗരം ചുറ്റിക്കാണാൻ ഗൈഡഡ് ടൂറുകളും (Hop-On Hop-Off Trolley Tour) ലഭ്യമാണ്, ഇതിന് ഏകദേശം 65 ഡോളറാണ് ചിലവ്, പക്ഷേ ഇത് തുറന്ന ബസ്സുകളിലാണ്. 4 മൈൽ നീളവും 2 മൈൽ വീതിയുമുള്ള ഇവിടെ കാൽ നടയായി ഒരറ്റം മുതൽ മറ്റെ അറ്റം വരെ  പോകുന്ന ധാരാളം യാത്രക്കാരെ കാണാം.
കീ വെസ്റ്റിൽ ചെറുതും വലുതുമായ നിരവധി താമസ സൗകര്യങ്ങൾ എളുപ്പത്തിൽ ലഭ്യമാണ്. ഇവിടെ ഞാൻ പഞ്ചനക്ഷത്ര ഹോട്ടലുകൾ കണ്ടില്ലെങ്കിലും, ലഭ്യമായ താമസസ്ഥലങ്ങളെല്ലാം ഉയർന്ന നിലവാരം പുലർത്തുന്നവയാണ്. 

ഈ മനോഹരമായ യാത്രയുടെ അവസാനം, കീ വെസ്റ്റ് ഒരു സാധാരണ അവധിക്കാല ലക്ഷ്യസ്ഥാനത്തേക്കാൾ അപ്പുറമാണെന്ന് പറയാൻ ഞാൻ ആഗ്രഹിക്കുന്നു. സാഹസികത ഇഷ്ടപ്പെടുന്നവർക്കും, ചരിത്രപ്രേമികൾക്കും, വിശ്രമിക്കാൻ ആഗ്രഹിക്കുന്നവർക്കും ഒരുപോലെ ആസ്വാദ്യകരമായ അനുഭവങ്ങൾ ഇവിടെയുണ്ട്. ഓർമ്മകളിൽ എന്നെന്നും തങ്ങിനിൽക്കുന്ന ഒരു യാത്രയ്ക്കായി നിങ്ങൾ കീ വെസ്റ്റിലേക്ക് വരിക!