ശ്രീഹരിക്കോട്ട: ഭൗമനിരീക്ഷണ ഉപഗ്രഹം നിസാര്‍ വിക്ഷേപിച്ചു. ഇന്ത്യയുടെയും അമേരിക്കയുടെയും ബഹിരാകാശ ​ഗവേഷണ സ്ഥാപനങ്ങൾ സംയുക്തമായി വികസിപ്പിച്ച ഭൗമനിരീക്ഷണ ഉപഗ്രഹം ആണ് നിസാർ. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്നാണ് വിക്ഷേപിച്ചത്. ബുധനാഴ്ച വൈകിട്ട് 5.40ന് ആണ് ഉപ​ഗ്രഹം വിക്ഷേപിച്ചത്.

നിസാറിന്റെ പ്രധാന ദൗത്യം ഭൗമോപരിതലത്തിലെ ചെറിയ മാറ്റങ്ങൾ പോലും സൂക്ഷ്മമായി നിരീക്ഷിച്ച് വിവരം കൈമാറുകയെന്നതാണ്. നാസ- ഐഎസ്ആർഒ സിന്തറ്റിക് ആപ്പർച്ചർ റഡാർ എന്നാണ് ഇതിന്റെ പൂർണനാമം. നാസയും ഐഎസ്ആർഒയും സംയുക്തമായി നടത്തുന്ന ആദ്യ ഉപ​ഗ്രഹ വിക്ഷേപണം ആണിത്.

പദ്ധതിയുടെ ചിലവ് 150 കോടി ഡോളറാണ്. ഇന്ത്യയുടെ ജിഎസ്എൽവി- എഫ് 16 റോക്കറ്റിലാണ് ഉപ​ഗ്രഹം വിക്ഷേപിച്ചത്. നിസാർ 743 കിലോമീറ്റർ അകലെയുള്ള സൗര സ്ഥിര ഭ്രമണത്തിലൂടെയാണ് ഭൂമിയെ ചുറ്റുക. ഇരട്ട ഫ്രീക്വൻസിയുള്ള സിന്തറ്റിക് ആപ്പർച്ചർ റഡാറിലൂടെ ഭൂമിയെ നിരീക്ഷിച്ച് ചിത്രങ്ങൾ പകർത്തുന്ന ആദ്യ ഭൗമ നിരീക്ഷണ ഉപ​ഗ്രഹമാണ് നിസാർ.